ابعد

بقلم: د. شيماء علام

1- ابعد .. عن اللى مش حاسس بقميتك ومتحاولش تثبتلة العكس لانه مصاص طاقة بيهدر وقتك ومجهودك .

2- ابعد ...عن اللى طبعه مش طبعك
متصغرش نفسك

3- ابعد .. عن الناس القاسية و حط تحت كلمة قاسية ١٠٠ خط اللي مالهمش عزيز ولا غالي

4- ابعد .. عن الكدابين بتوع الحوارات واللى بوشين عمرهم ما هيكونو مخلصين

5- ابعد .. عن اللى هونت مرة , هاتهون عليه الف مرة

6- ابعد .. عن الشكاك والنكدى وإللى ضميره اسود ، بيبقى من اللى جواه مفكر كل الناس زيه

7- ابعد .. عن بخيل المشاعر الانانى، هيستكتر عليك اى كلمه حلوة تجبر خاطرك

8- ابعد .. عن اللى شايف غلطتك كبيرة و غلطته صغيره أو شايف نفسه مابيغلطش، انت مش ناقص مرضى نفسيين ف حياتك

9- ابعد .. عن اللى تجبر بخاطره وتراضيه وتقربله ، وهو يفضل مكانه اللى ميحطكش كحله فى عينة متلبسهوش جزمة فى رجلك

10- ابعد .. عن اللى تسامحه مره واتنين ويكرر غلطه، بيبقى فاكر نفسه أذكى منك وانك مابتحسش

11- ابعد .. عن اللى ف شدتك عمرك ما لاقيته

12- ابعد .. عن اللى يصغرك قدام الناس

13-ابعد .. عن الكهين ابو دمعه الممثل هيجبلك الهم

14- ابعد ... عن المنافق والحاسد بيبانو ، المنافق هتفضحو شدتك والحاسد هتفضحو فرحتك.

ابعد .. وبس .. ما تبصش وراك تانى .. صدقني اللى هيخسرك مش هيعوضك تانى

ابعد من غير ما تعاتب , العتاب اتعمل للناس المحترمه الراقيه اللى أخلاقهم عاليه و اللى انت لسه باقي عليهم ,
خليك باقي على اللى باقى عليك ,
انك تنسحب من حياة الناس الي مش حاسه بقيمتك دي مش نداله لا دي منتهي القوه والجدعنه مع نفسك ..

قرب لولاد الأصول اللى تقربلهم خطوه يقربولك الف

وإللى قعدتهم مش هم ونكد اللى مابيعرفوش يجيبو سيره حد ولو اتكلمو على حد يتكلمو ف الخير

اللى لو ماكلمتهوش يكلمك هو يسأل عليك ..