دلال عبد العزيز تتصدر تويتر .. رامي رضوان"دعائي على الناس رد فعل انفعالي"
تصدر اسم الفنانة دلال عبد العزيز تريند تويتر والسوشيال ميديا، وذلك بعد انتشار شائعة وفاتها بشكل كبير، مما أدى لحدوث حالة من الغضب الشديدة لدي اسرتها، حيث خرج كل من الإعلامي رامي رضوان زوج دنيا، و الفنان حسن الرداد زوج إيمي، بتصريحات شديدة اللهجة وردود قاسية لكل من نشر وروج لهذه الشائعة "السخيفة" كما وصفوها.
عبر الإعلامي المصري رامي رضوان عن غضبه الشديد بشأن ما جرى تداوله، وتمنى أن يجد كل من نشر تلك الشائعة مثلها في أسرته والمقربين له، بالرغم من تأكيده على أنّه يتمنى الخير دائماً للجميع.
وقال رامي :"جنسه ايه ودماغه فيها ايه اللي قرر ينزل إشاعة ملعونه زي دي؟.. طب راعوا الظروف المؤلمة اللي عايشنها بقالنا شهور دلوقتي.. طب راعوا ضميركم.. طب راعو مهنيتكم.. طب راعوا انسانيتكم.. طب راعوا اي حاجة".
ومن بعدها حرص رامي على توضيح موقفه، خاصة بعدما قال :"بس فاض الكيل.. يا رب كل واحد نشر الإشاعة الملعونة دي يشوفها في حبايبه"، وكتب منشور اخر بعد ساعات، قال فيه :" للتوضيح...الدعاء لم يكن من قلبي..بل رد فعل انفعالي، فلا يسعدني ابدا ان يصيب اي انسان مكروه مهما كان، وربنا يدي كل انسان على قدر نيته وأفعاله".
من جانبه، هاجم الفنان حسن الرداد، من روّجوا تلك الشائعة، معتبراً إياها "مواقع صفراء"،وقال :"بالنسبة للمواقع الصفراء الرخيصة اللى كتبت أخباراً غير صحيحة عن حماتي دلال عبد العزيز، يا ريت تحترموا نفسكم شوية".
وتابع ا: "اللى بينزل أخبار غير صحيحة تخص حياة إنسان عشان يعمل تريند على موقع، يبقى واحد مش محترم، ولا يحترم المهنة بتاعته اللي ألف باء فيها وجوب تحري الدقة".
وعقَّب زوج إيمي سمير غانم، قائلاً: "إحنا بقالنا شهور في المستشفى، وكلنا متواجدين مع حماتي وقاعدين قدامها 24 ساعة، رامي وإيمي ودنيا وأنا، وفجأة يجيلنا سيل مكالمات ورسائل من كل أهلنا وحبايبنا بيطمنوا".
واختتم حسن الرداد: "حقيقي عايز اسأل اللى كتب الخبر، لو حد فينا كان بعيد وسمع الخبر ده حضرتك متخيل كان ممكن يحس بإيه أو ممكن يحصل له إيه على ما يتأكد إن الخبر مش مظبوط؟.. مش هقولك يا ريت يحصل فيك نفس الموقف عشان تعرف المصيبة اللي أنت عملتها بس حقول لك حسبى الله ونعم الوكيل".
