سك علي بناتك

#يوميات_مهندس_مشاكس

يكتبها: تامر راغب

في مسرحيه " سك علي بناتك " للراحل الجميل فؤاد المهندس .

يحضرني الموقف الذي دار بين فؤاد المهندس ( في دور دكتور رأفت ) وبين الفنان زكريا موافي ( في دور كريم )

لما كان فؤاد المهندس قاعد علي الكنبه و زكريا موافي بيقوله اقعد

و فؤاد المهندس كان بيهز نفسه علي الكنبه وهو بيبصله علشان يوريه انه قاعد

و زكريا موافي يقوله بصوته الرخيم : اقعد

يحط فؤاد المهندس ايده تحت ذقنه وهو قاعد

و زكريا موافي يقوله : اقعد

يغير فؤاد المهندس قعدته من اليمين لليسار والعكس وبهز رجليه

و زكريا موافي يقوله : اقعد

تذكرت هذا المشهد وانا اعاني يوميا من كاميرا الرادار تحت احد الكباري علي المحور الجديد المسمي لامؤاخذه " شنزو آبي "

السرعه علي هذا المحور ٨٠ كم/س

امشي علي ٨٠ كم/س وانا رابط الحزام الرادار يلقطني

امشي علي ٧٠ كم/س وانا رابط الحزام الرادار يلقطني

امشي علي ٧٥ كم/س وانا رابط الحزام الرادار يلقطني

امسك مقود القياده بايديا الاتنين وابص للكاميرا برضو الرادار يلقطني

امسك الحزام بايدي واشده من علي جسمي يمكن الكاميرا مش شايفاه برضو الرادار يلقطني

طيب والله العظيم مش عارف اعمل ايه ، انا كده حيتخرب بيتي مخالفات وانا مش عارف اعمل ايه في الرادار ده .

عايز اجرب بكره انزل من العربيه وادفعها دفع لغايه ما اعدي من الرادار ده واشوف حيصورني برضو ولا ايه

ياربي حتي الرادار مستقصدني ، طيب اعمل ايه في نفسي بس ، ارحمني يارب

أسعد الله اوقاتكم
دامت الابتسامه علي وجوهكم
ودمتم بخير