حلا شيحة تعلن حزنها وخوفها متسائلة :"هل انا مستعدة أقابل رب العالمين؟"
أعربت الفنانة حلا شيحة، عن حزنها الشديد لرحيل النجم الكبير سمير غانم، وقبله مصفف الشعر الشهير محمد الصغير، مشيرة إلى أن مشهد توديع الأول جعلها تفكر هل هي مستعدة للعالم الآخر أم لا.
كتبت حلا منشورا طويلاً عبر حسابها ب "إنستجرام"، و وضعت صورة ل"نعش الميت"، وقالت:"مشهد محتاج لحظات للتأمل ووقفة طويلة مع النفس كل ما تحصل حالة وفاة من قريب أو بعيد بلاقي نفسي جوا المشهد وبتخيل اللحظة دي لأنها مفيش مفر منها حتيجي فجأة أو بعد مرض المهم أنها جاية وكلنا حنمر بيها.. وبفكر يا ترى هل أنا مستعدة للحظة دي؟ مستعدة لاستقبال عالم تاني؟ مستعدة أقابل رب العالمين؟ مشهد مرعب أكن الامتحان خلص خلاص ومستنية النتيجة".
تابعت: "مشغولين برأي الناس فينا وشكلنا ومكانا وشهرتنا هتزيد إزاي ومحدش هينفعنا في اللحظة دي، بفكر كل لحظة علشان بحب ربنا ومتأكدة أننا كلنا بنحبه وبنحب كلامه وكلنا لينا لحظات خاصة معاه سبحانه، وكلنا عايزين نكون قريبين منه، وإحنا بنبعد بدل ما نقرب حتى شهر رمضان بقى شهر لكل حاجة إلا ربنا والقرآن مع أن مفيش أهم من آيات القرآن اللي إحنا ناسينه بقالنا كتير، وحتى لما نقراه بيعدي من غير تركيز حقيقي في معانيه، وكورونا اللي حاسة أنها دخلت حياتنا عشان تفكرنا وبرضو مكملين عادي".
اختتمت: "مش عارفة أعدي المشهد ده كده، وامبارح فضلت صاحية وصليت الفجر ومش عارفة أنام بفكر في أستاذ سمير غانم الجميل اللي كنت بتفرج عليه من صغري وقبله أستاذ محمد الصغير، وفكرت لو ده كان معادي حكون مستعدة؟ كلام صعب بس ده اللي جوايا".
تفاعل معها عدد من الفنانين منهم، عبير صبري، مي عمر، مايان السيد، هدى المفتي، والمطربة أمينة.
