ثورة غضب
كلمات: ميادة الشربيني
حرقنا كتير فأعصابنا
وثارت روحنا بغضبنا
وبعد الثورة والنيران
برود الطبع أهو صابنا
زمنا عايزنا تلاجه
نجمد فيها أحاسيسنا
نفكها لو نصادف يوم
بشر بيضحي وحاسسنا
ماكنا زمان دفا وأمان
وقلب مشاعره فياضه
وكان إنسان كما البركان
بيدي الحب بإراده
بقينا بندي مشاعرنا
نقط معدوده
قطاره
ووسواس قهري شجعنا
ونفس بسوءها أماره
وغصبن عنا سلمنا
وصوت العقل كلمنا
ماحلو الطبع بالقسوه
هيتمرر و ياخساره
