الخولنجان

#يوميات_مهندس_مشاكس

يكتبها تامر راغب

بستغرب علي الناس اللي مش عارفه الخولنجان

ايوه حضراتكم انت و انتي بلاش تبصوا جمبكم وتعملوا نفسكم عارفينه .

انا نفسي مكنتش عارف هو ايه

بس خلوني اعرفكم الاول ايه هو الخولنجان .

الخولنجان مش بودره عفريت ، ولا تميمه بنقولها علشان نُبْطِلْ سحر لاسمح الله .

الخولنجان نبات عشبي ، اوراقه كبيرة، يمتاز برائحته العذبة وطعم تابلي . يوجد من الخولنجان عدة أنواع مثل الخولنجان الصغير والخولنجان الأبيض والخولنجان الأحمر، وهناك أنواع أخرى تستعمل فقط للزينة وبعض من هذه الأنواع يصنع منه ورق الكتابة والبعض الآخر تؤكل سيقانه أو تطبخ. والخولنجان الصغير الذي يعرف علمياً هو النوع الطبي .

ندخل بقي في موضوعنا ، واللي حصل معايا

########################

ايوه عندي مشكله في تذكر الاسماء ، اسماء الناس ، اسماء الشوارع ، اسماء المأكولات ، وايضا اسماء المشروبات .

من اسبوع كنت بشتغل في المكتب و منهمك وانا ببعت ايميل ، ودخل عليّ الاوفيس بوي يسألني قائلا :

هو : تشرب حاجه يا باشمهندس ؟

انا : روحت مشاور ليه ناحيه اليمين وانا منهمك ومشغول ، وقولتله ايوه اعملي خولنجان .

هو : حاضر يا هندسه .

وراح عاملي قرفه بالجنزبيل .

هو : اتفضل حضرتك .

انا : عملتلي الخولنجان .

هو : ايوه ياباشمهندس امام حضرتك .

انا : تسلم ايدك حبيبي .

زميل لي كان قاعد معايا في المكتب سألني .

زميلي : هو ايه الخولنجان ده ؟ .

انا : خولنجان ايه ؟ .

زميلي : ده اللي انت قولته للاوفيس بوي وراح عملهولك .

انا : تصدق عندك حق ، وروحت منادي علي الاوفيس بوي قائلا :

انت يا ابني هو انا لما قولتلك اعملي خولنجان ، ازاي مسألتنيش ايه هو الخولنجان ، وازاي عملتلي الطلب صح زي ما انا كنت عايزه " قرفه بالجنزبيل " ؟

الاوفيس بوي : وهو بيضحك ماهو انا لقيت حضرتك بتشاور ناحيه البرطمانات اللي جمبك ومفيش هنا غير قرفه بالجنزبيل فروحت عملتها لحضرتك .

انا : احب انا الناس اللي تفهمني علي الطاير كده ، مش لازم اقول الحاجه صح ، المهم ان اللي قدامي يفهمني .

زميلي : صمت واندهاش ولا تعليق

لما رجعت البيت وحكيت لمراتي الموقف اللي حصل ده مش عارف ليه لقيتها بتقول وهي مخنوقه :

مراتي : يعوض علي عوض الصابرين يارب

تفتكروا هي مخنوقه من ايه
الظاهر كان نفسها تدوق الخولنجان

أسعد الله اوقاتكم
دامت الابتسامه علي وجوهكم
ودمتم بخير