جمهورية نفسي
كلمات: ميادة الشربيني
اكتشفت ف يوم وليله
إن أنا معرفتنيش
كنت طول الوقت بمشى
ف سكتي مقابلتنيش
ضاع طريقي وخد ملامحي
ف المرايه شوفت جرحى
لما شوفت صوره تانيه
مش أنا
متخصنيش
من زمان رسمولي صوره
زى ما يحبوا يشوفوها
كذبوا كل الملامح إللي فيا
وصدقوها
والغريبه أقنعوني
ولعالمهم جم خدوني
قولت عادي يغيروني
زى ما يتمنوا .. أعيش
لحظه فوقت لنفسي فيها
وقولت ليا
إنتي مين ؟؟
حولوكي لدمية سهل
يحركوها شمال يمين
وإتفقت على الميعاد
والمكان واللقاء
نفسى بس إللي معايا
لا حبيب ولا أصدقاء
وإطلب فإتنين لمون
قولت نبدأها بهدوء
غيبنا عن كل العيون
وإبتدا المزاج يروق
وإبتديت أنا بالسؤال
كنتي فين ؟؟
كنتي فين لما غيروا الملامح
لما رسموا واحده تانيه
وإتنازلتي وقولتي .. اسامح
لما شوفتيها ف مرايتك
ده حقيقي مهزكيش ؟
ليه إتنازلتي عن وجودك
عن كيانك عن وعودك
لما قولتيلي هحبك
تنكري ؟
موعدتنيش؟
لما طمنتيلي قلبي
قولتي ليا متخفيش
ليه إتنازلتي وليه ضعفتي
ليه إتقهرتي وفجأه خوفتي
شوفتي وصلتيني فين
تفتكري مكسرتنيش؟
ع العموم الوقت ضاع
ف العتاب وع الملامه
نبتدى صفحه جديده
والقديمه مع السلامه
عقلي ملكي ويبقا ليا
أقوى بيكي وتقوي بيا
أبقا نفسي وصورتي رسمي
والملامح هى هى
يغيروكي متسمحيش
جمهوريه بس .. لينا
نبني فيها كام مدينه
إللي يرضى بالنظام
من ضيوفنا وليه مكان
وإللي يعترض نقوله
أسفه جداً إكتفينا
والحقيقه مكان مفيش
