بلادي

شعر: أسماء كامل

من ديوان (دنيا جديدة)

بلادي خيمة مضللة
ف قلوب ولادها بتراضي
سحابة حب حنيِّنة
نسمة وهواها طيف هادي
والصبح فيها بيبتسم
وجماله نوَّر فى فؤادي
جندي وحارس للوطن
صلّي ويهتف يابلادي
بلادي يا أم العرب
حاضنة الغريب والمغترب
ولو وصفتك بالحروف
مايكفكيش ملايين كتب
ف الشدة ام الجدعنة
جاهزة وكمان متمكنة
وعشان ما ابطالك أسود
عايشة ف أمان متطمنة
وفيكِ نهر الخير بيجري
النخوة ف عروقك بتسري
قوية ثابتة وطيبة
مهما الكلاب عليكِ تعوي

يحميكِ ربِّي م العِدا
دي مصر عشق الأفئدة
فيكِ الرضا فيكِ الأمان
فيكِ الأصول مُتشدِّدة
يا مالكة جوَّانا الحنين
أؤمري و هنقول امين
دا قالها ربِّي في الكتاب
إدخلوها آمنين