حدوتة. صوتي مع مامتي

بقلم: شيماء أبوزيد

كان ياما كان ياسادة ياكرام ولا يحلى الكلام الا بذكر النبي عليه الصلاة والسلام...
كان في مرة زمان ولد جميل معروف عنه إنه مؤدب وكل الناس بتحبه من أدبه وأخلاقه الجميلة، في يوم من الأيام طلب من مامته حاجة، وبعد مناقشات كتير مع ماما مقدرش ينفذ طلبه وماما رفضت.
فجأه الولد اتعصب ورفع صوته على مامته، ومامته زعلت جدا لكن رفضت انها ترد حتى عليه وانسحبت وكررت مش هتتعامل معاه طول ماهو بيتعصب كدة وخصوصا انه معروف عنه أخلاقه وادبه وان عمره مازعل مامته ابدا...
فجأه سمع شيخ بيقرأ قرآن في التلفزيون بيقول
بسم الله الرحمن الرحيم (ولا تقل لهما أف ولا تنهرهما وقل لهما قولا كريما)
صدق الله العظيم
الولد زعل من نفسه جدا وندم انه زعل مامته وزعل ربنا وجرى بسرعة على مامته اعتذرلها ووعدها أن عمره ماهيتعصب أو هيزعلها تاني أبدا
وطبعا ماما قبلت اعتذاره وقالتله أن أي أم في الدنيا بتحب أولادها أكتر من نفسها، ونفسها تحققله كل اللي بيحلم بيه لكن برده الاولاد الحلوين لازم يقدروا ويحترموا ظروف مامتهم وباباهم ومهما حصل مش صح نتعصب على ماما..
الولد الجميل كرر إعتذاره لمامته ووعدها أن دي هتكون آخر مرة يعمل التصرف ده وهيكون ولد جميل بيسمع كلام مامته علشان يدخل الجنة ويسمع كلام ربنا كمان
وتوتة توتة خلصت الحدوتة وإستنونا في حدوتة جديدة مفيدة