مصدقين نفسكم

كلمات: مياده الشربيني

مصدقين نفسكم
ياللى عايزين تخربوها ؟؟
العقل خلاص صورلكم
سهل وبسيطه تضيعوها ؟؟
إزاى قولولى بتقدروا
تخططوا وتدبروا
وتناموا وانتو مبيتين
النيه تصحو تدمروا
إزاى تعيشو ف حضنها
وتاكلوا من خير أرضها
وتبيتوا النيه عشان
الطعنه تيجى ف قلبها
مصدقين إنكم
عايشين غلابه ومكسورين
والبرد لما بيسرى فيكم
ف حضن مين مدفيين
أمن وأمان بيوت حيطان
جواها مش متطمنين
دى مصر أم الدنيا فوقوا
تفتكروا سهل تضيعوها
ف منامكو قاعدين تحلموا
إزاى تقسموا وتبيعوها
كان غيركوا أشطر ياما حاولوا
وفشلوا بردو زيكم
معقول حقيقي والنبي
مصدقين نفسكم ؟؟
بتقولوا ماسر
وبتسخرو من اسمها
بايعين أمانها وأمنها
بتشتكوا من أكلها
نيلها وسماها وأرضها
طب جربوا تتغربوا
من حضنها يلا إهربوا
وإتجمعوا ف شلة ضياع
نخوه ورجوله خلاص وداع
ولما تتلاقوا ف يوم
عدو بقا
كام منكو ضاع
وتبقا قصه تتحكى
ف يوم الإنتصار
الليل خلص
لما إنتهيتوا رجع النهار
حقيقي إنتو مغيبين
تستاهلوا فعلاً الانهيار
مستكترين التضحيه ؟؟
دا الصبر مفتاح الفرج
طب م الجنود ع الحدود
مضحيين ب الحياه
وب العيال وأمهم
فيه أغلى من كده تضحية
دفعوا ولا يوم همهم
سمعتوا يوم ثاروا الرجال
والدم غرقان ع الرمال
قالوا غيتونا قالوا إرحمونا
ولا الشهاده واجب علينا
لما الوطن يحتاج لنا
نفديه ب روحنا
وتسيل جروحنا
على أرضها من دمنا
مش بيع القضيه ياعمنا
مالى أنا ومال الصراع
أنا عايز أثور عندى صداع
مش لاقى سكر ف شاى أحطه
يعدل مزاجى ويظبطه
وإزاى أعيش حلو مفيش
عايزنى أسكت مشتكيش
لأ يلا روح قوم و اشتكى
وقول ياناس ثورة جياع
ابكى وولول بكى السنين
وجهز خطه للخداع
احرق ودمر لو كنت تقدر
لكن متنساش وافتكر
وقت الحساب مين إللى باع