ماجد المصري يروى قصة تعرفه على زوجته

كشف النجم ماجد المصري عن الطريقة التي تعرف بها على زوجته رانيا أبو النصر وروى كواليس خطبتة وعقد القران في شهر واحد.

قال ماجد المصري خلال لقائه مع Gossip: رانيا من طنطا هي بنت خالة صديق عمري .. دايما لما كنت بكون موجود في أفراح العيلة كانت بتبقى موجودة .. كنت دايما أهزر وأقول أنا هخطب البنت دي لما تكبر هي كانت بتحبني من أيام مسلسل لدواعي أمنية بس هي أخدت الجملة بجد وأنا كنت بهزر .. حتى وقتها زمان بعد ما انفصلت عن أم أولادي كنت خاطب فنانة وحضرنا فرح هي كانت موجودة فيه وعرفت بعدها أنها كانت متضايقة.

تابع: كنت في عيد ميلاد ماهيتاب بنتي وصاحبي عزم رانيا بنت خالته .. لقيتها داخلة قلت إيه دا مين الوحش اللي داخل دا مين دي؟ عرفت أنها رانيا وقلت هخطبها صاحبي قالي إنه خطبها، قلت له هتسيبها وأقسمت بالله إني هخطبها لكن طلع بيشتغلني ورحت اتصور معاها سألتها إنتي مخطوبة لحمادة قالت لي أه .. قلت لها انسي وقعدنا نهزر وبدأنا نتكلم وربنا أكرمني بيها".

أضاف: هي كانت آخر سنة في الجامعة وكان في فرق بينا والدها حسيت إني لو طولت في الخطوبة ممكن يغير رأيه وياخدوا بالهم .. يوم الجمعة قرينا الفاتحة اللي بعدها الخطوبة وبعدها كتب الكتاب وأخدتها واتجوزنا.