رسالة لكل راجل وست

طريق السعادة

بقلم:د.هالة منصور أستاذ علم الاجتماع

بيت العز يابيتنا. بيت العز هو بيت الأمان. هو البيوت إللي ممكن تلاقي فيها السكن والمودة والرحمة وراحة البال. هي البيوت إللي مراكز الإحسان فيها متصلة. الكل حاسس بالكل. في الفرح. في اللهم. في السعد. في الوجع. قبل مانتكلم نتسمع. قبل ما نطلب نسأل. قبل ما نقول محتاجين نلاقي إللي ياخد بأيدينا ويطبطب علينا.

وكلمة السر في المودة والرحمة حكمها الرحمن ووضع الأساس علشان يعلي البنيان ويسعد الإنسان. والمودة يعني كل طرف يتودد للآخر ويحاول يقدم إللي يقدر عليه بحب وود ومحبة ورضا. والرحمة أننا نعرف بعض. نساعد بعض. نحنّ علي بعض. نتغاضي عن أخطاء أو عيوب أو سلبيات بعض. يعني الراجل لما يبخل يعبر لمراته عن حبه ويقلل من جهدها ويدور علي عيوبها ودايماً يكسفها أو يعنفها. ده منافي للمودة والرحمة. الراجل إللي طول الوقت مركز مع العيوب فقط. وما يعرفش يجامل مراته ويطبطب عليها ويسعدها وقت التعب ويفرحها ويساعدها وقت الوجع ده منافي للمودة والرحمة.

الست اللي تحمل جوزها فوق طاقته وتحسسه إنه مش قادر يسعدها أو يرضيها حتي لو بحاجة بسيطة ده منافي للمودة والرحمة.

الست اللي تقلل من إمكانيات جوزها مهما كانت بسيطة وتحاول تفكره بضعفه أو تحمله أكثر من طاقته ده منافي للمودة والرحمة.

الست إللي بتبخل علي بيتها بأي جهد تقدر عليه ده ضد المودة والرحمة. الست إللي تبخل علي جوزها بنظرة رضا أو كلمة إعجاب أو تصرف عرفان ده منافي للمودة والرحمة. القسوة.

راجعوا أنفسكم. كل زوج وزوجة. كل ابن وبنت. كل أخ وأخت. نقحوا لغة الخطاب الديني والاجتماعي والإنساني بوعي وعلم ومحبة كي تعيدوا بناء ثوابت الأسرة المصرية وفقا للمنهج الرباني. فالأسر لا تبني بالقوانين والتشريعات. الأسر تبني علي المودة والرحمة والفهم السليم لمعاني الدين بنظرة موضوعية وإصرار علي ارضاء الرحمن بحثاً عن السعادة وبيوت العز. وللحديث بقية إن شاء الله.