د. انجي ابراهيم: خدعوك فقالوا.. كثرة تناول فيتامين"ب" مفيد للأعصاب

"اللي يزيد عن حده ينقلب ضده" مثل قديم اعتدنا على سماعه وبالرغم من ذلك يقتنع الكثيرين بعكس معناه، وقد يمر الأمر مرور الكرام الا في المسائل الطبية التي لا يقبل فيها ذلك. ويصبح تناول بعض الأمور بهذا المنطق يندرج تحت مفهوم "الخداع"

وتحت هذا المسمى "خدعوك فقالوا" يمكن ادراج العديد من المفاهيم الطبية الخاطئة.

قالت الدكتورة انجى ابراهيم استشارى الأمراض الباطنية بجامعة القاهرة ان من ابرز المفاهيم الخاطئة : خدعوك فقالوا: كثرة فيتامين ب (vitamin B) هام جدا للاعصاب.

حيث اكدت ان الكثيرين مقتنعين بأن كثرة استخدام فيتامين ب مفيدة للاعصاب.

واوضحت: "فيبدأ الشخص ياخد حقن و اقراص فيتامين ب بشكل هستيرى علشان يعالج لو فى تنميل او شكشكه او رعشة او اجهاد و يقوى الاعصاب كده
طيب فين المشكلة؟
المشكلة ان كثرة تناول فيتامين ب و بالذات ب ٦ (pyridoxine) زى ما بيعالج التهاب الاعصاب الطرفية هو نفسه لو زاد عن مستوى معين فى اليوم و لفترة طويلة بيعمل التهاب فى الاعصاب الطرفية و بالتالى يزيد التنميل و الشكشكة.

المشكلة التانية ان المريض ياخد حقن مع اقراص مع تحت اللسان و كله فى الاخر فيتامين ب بانواع مختلفة و تركيز عالي جدا و ده طبعا بناءً على نصيحة المعارف.

المشكلة التالته ان فيتامين ب ممنوع تناوله فى امراض معينه زى مرض الشلل الرعاش ‍ لانه حيكسر الادوية الاساسيه فى علاج الشلل الرعاش و يبقى النتيجة ان الاعراض مش بتتحسن!

يبقى النصيحة لو المريض محتاج فيتامين ب الطبيب حيكتب النوع و الجرعة و اهم حاجه المدة كمان اللى حيستمر عليها المريض".