جدل على "اللي مالوش كبير".. والمؤلف يرد:"مش هخالف ضميري.. اللي عايز بتبسط يروح دريم لاند"
جدل كبير أحدثه مسلسل" اللي مالوش كبير"، بسبب مطالبات الجمهور ان تكون النهاية سعيدة وتكتمل قصة حب غزل "ياسمين عبد العزيز" و الخديوي "احمد العوضي".
وعلق مؤلف العمل عمرو محمود ياسين بشكل حاد على الجمهور، وكتب عبر صفحته:"الدم بيجيب دم والافترا والبلطجه عمرهم ما يحموا انسان او يضمنوا له حياه سعيده او مريحه اللي عايز يتوب يتوب. بس مش بعد خراب مالطه. عشان كده في شطر في التتر بيقول واللي يختار غلط سكوته يدمره".
اضاف :"بمعني ان اللي يختار غلط و يفضل ساكت ع غلطه، مع الوقت هيتدمر و ده اللي حصل مع الخديوي في الحلقتين اللي فاتوا راح منه اخوه وراح صديق عمره وراح الجنين اللي كان في بطن امه، دي النتيجه الطبيعيه اما بقى اللي كان مستني قصة حب بين بلطجي كيوت و ست حلوه و متضايق وبيقولي احنا بنتفرج عشان نتبسط و زعلانين مني قوي فا احب اقلك ان ده مسلسل تراجيدي".
اختتم كلامه ب :" مش هخالف المنطق ولا ضميري عشان بعض الناس تتبسط انا مش بعمل نهايات على الكيف يا جماعة انا بعمل النهاية اللي اشوفها منطقية واللي عايز يتبسط و هيه و كده يروح دريم لاند مثلا ".
وعندما اعلن البعض ازعاجه من طريقة حديثه، وضح الأمر وقال :" في بعض الناس شايفني حاد في البوستات اللي فاتت و ده سببه ان بعض الناس في جروب معين بيتكلموا بتجاوز كبير و بحده كبيره .. و الناس دي عارفه نفسها كويس .. و عشان كده انا برد بنفس درجة الحدة بتاعتهم فلو حد زعلان مايزعلش".
