استياء من عمرو مصطفى بعد هجومه على الهضبة ونجم الجيل

أثارت حلقة الملحن عمرو مصطفى مع الاعلامية بسمة وهبة في برنامج "الغرافة" الجدل بشكل كبير، بسبب تصريحاته عن الهضبة عمر دياب ونجم الجيل تامر حسني، مما تسبب في استياء من بعض الملحنين الذين رفضوا طريقته وأسلوب كلامه عن هؤلاء النجوم.

استنكر مصطفى خلال الحلقة ان يطلق على تامر حسني "تاريخ"، وقال :"هو كل ملحن بيعمل أغنيتين الناس بتقارنه ببليغ حمدي.. التاريخ.. إيه هو تاريخ ومسيرة تامر حسني؟.. لسه قدامه كتير عشان يشتغل تاني".

اما عن عمله مع الهضبة ، قال "عملت 20 عاماً مع عمرو دياب وفلوس شغلي معاه جبتها في فرحين أعملهم في يوم واحد، وتاريخ عمرو دياب كله آخر 20 سنة بتاعي".

وأشار عمرو مصطفى إلى أنه كان سيوافق على أي أجر يعرض عليه حال تقديمه لحن الأغنية الوطنية لعمرو دياب، قائلا: "انا استفزيت أني معملتهاش لأن أنا أولى واسمى مرتبط بعمرو دياب أكتر واحد، ولو هتعمل حاجة كبيرة تبقى معايا، بس اتخذلت وأننا بدي كتير فمش هدي تاني".
اضاف"أنا نجم بدون أن أقلد الفنانين، وعندما أسير مع عمرو دياب أو شيرين عبد الوهاب في الشارع أكون معروف أكتر منهم".

كما أكد على اكتشافه للعديد من الشعراء الموهوبين خلال مشواره الفني كتامر حسين وعادل حقي وحسن الشافعي، لافتًا إلى أن أحب الملحن لديه شريف تاج، الذي يتمنى ظهوره مرة أخرى على الساحة الفنية.

في المقابل اعلن الموزع احمد عبد السلام عن رفضه هذه التصريحات وكتبت عبر صفحته الشخصية :"مكنتش حابب أتكلم عن أحد الزملاء في الوسط الفني، ولا ده أسلوبي، وعارف إن فيه ناس ممكن تزعل، ولكن كلام الملحن عمرو مصطفى استفذني جدآ، أولاً تامر حسني فنان ناجح جداً، ومجتهد، ويستاهل يكون نجم كبير بفنه وبأخلاقه، ده بالنسبة لتامر حسني".

اضاف:"ثانياً أنت دايما بتقحم اسم عمرو دياب في أي برنامج ليك، عشان تعمل شو وتروج لنفسك، مش فاهم مع أنه أكثر حد وقف جنبك، وكان سبب رئيسي في اللي أنت فيه دلوقتي، وعلي فكرة بقي عمرو دياب ناجح من قبلك بكتير، وبينجح دلوقتي من غيرك برضه، وكذلك حماقي والجسمي، وكل النجوم اللي ذكرت اسمهم. "

استكمل :" ياريت كمان تبقى تدي الناس اللي اشتغلوا معاك حقوقهم المادية والأدبية.، كفاية كده، ومش هقولك غير جملة واحده عن النبي صلي الله عليه وسلم "لا يدخل الجنَّة من كان في قلبه مثقال ذرَّةٍ من كِبر."، ربنا يهديك وتركز في شغلك أحسن بدل ما تجيب في سيرة الناس".

ثم قام بحذف البوست بعد تواصل عدد من الأصدقاء معه، وقال بكتابة :" صديقي وحبيبي الشاعر تامر حسين كلمني بخصوص البوست اللي نزلته عن الملحن عمرو مصطفي وحاول يعرف مني لو فيه اي خلاف ما بيني ومابين عمرو لكن لا مفيش اي حاجة خالص كل الموضوع اني زعلت من بعض التصريحات لكن في النهاية عمرو حبيبي وفنان كبير...حصل خير ورمضان كريم".