حجر داير

شعر: أسماء كامل

انا اللّي كتبت وف حبَّك كلام ألحَانُه
تتغنى في 100 موَّال
وانا اللّي قطعت بكعوبي لأبوابَك
سكَك شايكَة وبالأميال
وانا اللّي روحِي خمّتني وأخدِتني
حجَر داير بألف سُؤال

وانا اللّي شِربت وبإيدك مَرار الشَّهد
وشهِدت وقُولت حبِّيته
داريت ف طَعم المُر وسهِرت بكَاس
من ذُّل انا رضيتُـه
وعِشت قد ماعِشت ماعشِقت انا أو شُوفت
غير جنِّة سوَاد بيتُه

ومنين حَ جيب الصّبر يااهل اللّٰه
ونَظري حدوده كَات شوفُه
وح امحِي ازاي حُروف إسمه
دا وشَم القلب بحروفُه
قولولي ازاي ح يكمَل عُمري ونبضي مدَاه
شُعاع طيفُه

ياطارحين في القلوب الشوق بتروّوا الطَرح
ليه بعذَاب؟!
وليه تمضُوا لقلوبنا صكُوك بتوعدنا
بأمل كدَّاب؟!
وليه كل امَّا طرحي يرُوق الاقِي الطَّرح
وَهْم وغَاب؟!

يا كَاسرين في السِنين مرسىٰ كانت
أوتاده منصُوبة
يا ناصبين القَهر فوق رحمَة عاشِت
بوجودكُوا مرعُوبة
يا راميين الحِمل فُوق كِتفي أنا كِتفي.
أعلَن التُوبة

ويعينَّا اللّٰه..
يعينَّا اللّٰه على روحنا اللّي شردانة
وحيرانة بقالها سنين
قادِر ربنا يروي شقوق حفَروها جوَّانا
بَشَر ظَالمِين
وحَدَّ اللّٰه ما بيني وبين اللّي ظلمُوني
ليوم الدين