صرخة جوف

شعر: أسماء كامل

طب ايه رأيكوا لو شوفنا الدنيا بعين ميّت!!
أو مرّة نشوفها بعين مظلوم ومتأيّد
وان مرّة لمحنا خيال اللّي آنينا..
نِركعله بـ أؤمرني ياسيّد

وتعالوا نتدّارى ف صرخات بتبأبأ..
في بحور الخوف
ونحارب في انفاس تتمنّى تخرج م الجوف
نكتب في كلام واشعار مش أكتر..
مِن رص حروف

وبينا نطبّش ف ظلام لايّام ونعيش بلاويهَا
ونواسي ف ايتام بتدّور على حق يجيها
بقى يعني قلوبنا ح تِخلِص لبلدنا..
أكتر من قلب اللّي حاميها؟!

خلينا نبص لنسوان أيّامنا وهي بتتهز
ونشوف الذُل على الخصر بيعلى ويترص
نفتح للجُبن ابواب عُمرِنا وبكل ذكاء..
يرسى ويندس

وادينا ماشيين بنتدارى في عرض الحيط
ونقلِّب دواليب أيّامنا علىٰ حتِّة خيط
وعليها نعلَّق أسبابنا في عشيتنا عبيّد

يا كُل اديان السَّما يلَّا شاركوا معانا
مسيحي ومسلم مش فارق.. كلّه حزانى
خلينا نبان كانِّنا عايشينها على هوانا

وتعالوا نختار العبوديّة اللّي تليق بينا
ونمثّل اننا بنبادل في أرآء ترضينا
ونخرج للدنيا والضحكة قافلة عنينا

ياصرخة قهر مخنوقة دا الجُوف تعبااااان
يا شهقِة روح وبتقطَّع في جسد هلكااااان
يا خااااالق الصَّبر إرحمني دا انا إنساااااان