غمزة حياه

شعر: أسماء كامل

كُنت مَاشيَة ف سِكَّة ضَلمَة
رَاح غَمِزلِي برِمش عينُه
سَهم رِمشُه لمَّا صَابنِي
قَام فَرَش ف العُمر نُورُه
وامَّا هَمسُه الحِلو خَدنِي
تَوهْت ويَّاه لِيل بطُولُه

كَانِت الأيَّام سَاعِتهَا
فَارشَة جُوَّة العُمر مُر
والسِّنيِن كَانِت تمَلِّي
تِرمِي فُوق طَريقِي جَمر
والحَيَاه كَات لمَّا تضحَك
تبقىٰ ضِحكَة آخِرهَا غَدر

قَلبِي زَي مَايكُون مَا صَدَّق
يلقَىٰ شِبَّاك لِلحيَاه
والضيَاع ف ايَّامِي صدَّق
إنُّه يبقىٰ طُوق نجَاه
قُولت يمكُن يلقىٰ هوَّ
جُزء حسَّاه فيَّا تَاه

واتولَدت ف حُضنُه لمَّا
لقِيتُه مِستَحمِل مَرارِي
والدَّفَا اللِّي ف قَلبه جنَّة
تشفِي وجَعِى تطفِي نَاري
ودُنيتِي بدأت تنوَّر
يارَب مايخِيب اختيَاري