بائعة خضار تحت الأمطار شقيانة من صغرى وربنا بيعوض

مدخلتش مدارس ولا اعرف القراءة لكن اتعلمت المسئولية

شقيانة من صغرى حتى بعد ما جوزنا العيال وقلت هرتاح ، المسئولية زادت وكملت مشوار الشقاء ، هذا كان رد ام اسلام بائعة الخضار على سؤالنا ليه قاعدة فى الشتاء ؟!

استكملت حديثها ، مدخلتش مدراس ولا اعرف القراءة ، لكنى اتعلمت المسئولية من صغرى ، ظروف اهلى كانت صعبة واللى جاى على قد اللى رايح ، جه العريس اتجوزنا على قد حالنا ، بعد سنة ربنا كرمنا بمولودنا الاول وسنة وراء سنة بقو 3 عيال ، دخل جوزى كان بسيط عامل فى ورشة طوب ، وكل يوم الحمل بيتقل ، كنت بشتغل على قدى يوميات فى مواسم الحصاد الزراعى ، لكن طلبات العيال كل يوم بتزيد ، لقيت مفيش مفر انى اشوف شغلانة دائمة ولاننى فلاحة فاحمة فى الخضار ، توكلت على الله واشتغلت فى بيع الخضار ، من عام 94 وانا ببيع خضار فى شارع داير الناحية ومع العشرة الطيبة كل المنطقة بتعاملنى انى واحدة منهم

ربنا كان بيرزقنا برزق عيالنا ، لحد ما يوم من الايام جوزى تعب ، كشفنا عليه لقينا عنده الكبد والطبيب قال انه فى مرحلة ماخرة ، المهم جوزى قاوم شوية ، لكن ما استمرش كتير ، التعب زاد عليه واضطر يقعد فى البيت

صحيح بع مرض زوجى من 9 سنوات الحمل زاد ، لكن ربنا بيقطع من هنا وبيوصل من هنا ، كافحت وبكافح وهكافح واديك شايف الدنيا بتشتى وانا على فرش الخضار بس ربنا بيزرق ومبيضيعش تعب حد والحمد لله مستورين وشغلى موفر متطلبات حياتنا واهم حاجة "مش بنمد ايدينا"

سنة وراء سنة العمر جرى والعيال كبرت واتجوزو واحد وراء التانىة والولد كمان ، الحمد لله كبرناهم وعلمناهم وفرحنا بيهم والاسرة بقت اربعة وبقالهم حياتهم الخاصة ولسة ربنا مقدرنى وبساعدهم