كلام عن الجن
يوميات مهندس مشاكس
رؤية تامر راغب
من ذكرياتي مع جدتي
جدتي الله يرحمها كانت بتخاف تتكلم عن اي حاجه ليها علاقه بالجن او السحر والشعوذه .
وكنت انا بحب افتح الموضوع ده قدامها ......فكانت تقوم علي الفور وهي مفزوعه .
وفي يوم اتفقت انا واخويا ان احنا نعمل فيها مقلب معتبر .
كنا لسه شاريين استيريو جديد وكنا حاطينه في غرفتي انا واخي .
اتفقت معاه ان احنا نضبط التايمر بتاعه بحيث انه يشتغل بعد ثلاثه دقائق ونعلي الصوت علي الآخر .....ونطلع بره الغرفه ونقعد مع جدتي ونتكلم عن الجن والسحر وكده
وهوووب يقوم الاستيريو يشتغل ونشوف رد فعلها .
خرجنا بالفعل لقيناها قاعده في الصاله فقعدنا معاها ودار الحوار التالي :
انا : بوجه الكلام لاخي : بقولك ايه انا حسيت امبارح في الاوضه بحركه غريبه مش عارف سببها .
جدتي :" بسم الله الرحمن الرحيم " بطل يا ابني كلام في الحاجات دي .
اخي : ايوه ياتامر صح حسيت ان في حركه في الاوضه امبارح بالليل .
جدتي :" بسم الله الرحمن الرحيم "
انا : الغريبه اني لما فتحت النور الصوت ده اختفي .
جدتي : بصوت عالي " بسم الله الرحمن الرحيم "
يا ولاد في عرض جاه النبي بطلوا كلام في الحاجات دي .
اخي : طيب خدت بالك ان في حاجات بتتحرك من مكانها في الاوضه دي .
انا : ايوه فعلا بحس ان الحاجات بتتحرك من مكانها وبسمع صوت خربشه علي الحيطه .
جدتي : بصوت عالي " اعوذ بالله من الشيطان الرجيم " ......" بسم الله الرحمن الرحيم " .....بطلواااااااا كلام حالا .
اخي : شكل الاوضه دي مسكونه .
انا : علي فكره الجن يقدروا يعملوا حاجات كتير لو هم سامعينا .
اخي : زي ايه ؟
# بصيت في الساعه لقيت الثلاثه دقائق خلاص قربوا يخلصوا والاستيريو حيشتغل باعلي صوت لوحده #
انا : ممكن واحنا بنتكلم دلوقتي الجن يطفوا ويولعوا نور الاوضه مثلا ......وممكن مثلا يشغلوا الاستريو اللي في اوضتنا ......وده تعبير عن انهم خلاص حيأذونا ويأذوا كل اللي سامعنا .
جدتي : بصوت عالي جدا وهي بتغلوش علينا...... " اعوذ بالله من الشيطان الرجيم " ......" بسم الله الرحمن الرحيم .
واشتغل الاستيريو في الاوضه باعلي صوته .....واتنفضت جدتي وطلعت تجري بعيد عننا وهي بتصرخ باعلي صوتها " الحقووووووووووووووووني "
قعدنا يوم كامل نحاول نقنعها ان ده مقلب وان الاستريو ليه تايمر وممكن يشتغل لوحده ......وهي راسها والف سيف ان الجن هو اللي عمل كده وان احنا بنقول كده علشان نطمنها .
اللي صعب عليا فعلا بابا وهو عمال يهدي فيها ويبصلنا ويقول " حسبي الله ونعم الوكيل فيكم ".....حتقصفوا عمرها بدري .
