قوه ملاحظه

يوميات مهندس مشاكس

يكتبها: تامر راغب

مفيش راجل في العالم لم يمر عليه ما مررت به .
واعتقد إن الموقف اللي ححكيه ده بيحصل لكل الرجاله في بيوتها .
لكن وبما إني إنسان مش عادي فده اللي حصل معايا :
# دائما وابدا ما تفاجئني مراتي بالسؤال ده :
مش ملاحظ حاجه غريبه في الشقه ؟؟
مخدتش بالك إيه الجديد في الريسبشن ؟؟
طيب مش ملاحظ حاجه جديده فيا ؟؟؟
واقعد اضرب بعيني يمين وشمال..!!!
واضرب اخماس في اسداس...!!!
وللأسف كل مره مش بلاقي غير اجابه واحدة هي لأ معلش مش واخد بالي .
تروح مكشره وتقولي انت دايما كده مش واخد بالك من الحاجات الجديده اللي بعملها ....!!!
دا انا كنت مستنياك علشان تاخد بالك وترفع من روحي المعنوية ...!!
أرد اقولها : طيب ياحبيبتي ممكن تقوليلي ايه اللي انا مخدتش بالي منه..؟؟
يكون الرد كل مره بحاجه شكل كالآتي :
* مره مفرش السفره كان من غير خرز و هي غيرته بواحد جديد بخرز .
* ومره الفازه اللي محطوطه علي الشيفونيره كان اتجاه الورد ناحيه اليمين ودلوقتي اتجاهه لليسار .
* ومره الكومود كان المفرش اللي تحت الاباجوره اللي عليه ساده ودلوقتي المفرش سمبوكسات .
* ومره سقف الغرفه كان ساده وهي لزقت في أم السقف نجوم بتنور .
* ومره الحلق اللي لابساه في ودانها كان بيلمع والجديد مط مش بيلمع .
وربنا ما يوريكم بقى بحس بنار جوايا وبحس اني تحولت لتنين عايز انفخ نار تحرق البيت باللي فيه .
المهم بفضل الله وكرمه وبفضل دعوات والدتي ووالدي وبفضل دعاء الصالحين من عباده ، وانا راجع من الشغل وبقفل باب الشقه ورايا ربنا كرمني وشفت تابلوه عباره عن بوكيه ورد صناعي مراتي معلقاه وراء الباب .
روحت منادي عليها باعلي صوتي وابتسامة المنتصر على وشي وانا بقولها ازيك ياحبيبتي شفتي انا خدت بالي من بوكيه الورد اللي وراء الباب إزاي .
ردت عليا وهي مبتسمه وفرحانه جدااااا
بجد ياتامر عجبك ؟؟
قلتلها والله روعه ياحبيبتي .
ردت عليا : الحمد لله انه عجبك وإنك خدت بالك منه .
قلتلها بابتسامه خبث كده وهو انا من امته مش باخد بالي من اي حاجه حلوه بتعمليها .
هنا بقى ، إتغير شكلها خالص من الفرحه للغضب وردت عليا قائله :
البوكيه ده بقاله هنا وراء الباب ٨ سنين يابيه
بجد انت حتشلني...!!!
فجأة لقتني مش عارف انطق الحقيقه ...!!
بس كل اللي كان نفسي اعمله إني أدور الضرب في ولادي الأتنين من كتر الضحك اللي عمالين يضحكوه عليا .
أسعد الله اوقاتكم
ودمتم بخير