ياسر ريان: القيعي "خباني" في بيته من الزمالك.. ووقعت للأهلي في منزل صالح سليم
كشف ياسر ريان نجم الاهلى ومنتخب مصر الاسبق، كواليس مثيرة حول انتقاله للقلعة الحمراء من المنصورة.
وقال ياسر ريان فى تصريحات لبرنامج "ساعة مع شوبير":"من صغرى وأنا بحب الأهلى ومش حب عادى، أنا مثلا مش بتفرج على أى فريق إلا الأهلى ولو الخطيب ملعبش مزاجى يتعكر طول اليوم، ولما روحت المنصورة ولعبت وتألقت كان حلم عمرى ألعب فى الأهلى".
وأضاف:"الزمالك فاوضني وسألونى فى المنصورة قولتلهم مش هلعب غير فى الاهلى، لقيت المهندس عدلى القيعى بيكلمنى وقالى تلعب فى الاهلى قولتله طبعا، قالى هنتقابل فى طنطا عند السيد البدوى فى كشك هناك بتاع حلويات استنانى هناك، روحت لقيت 50 كشك حلويات بقيت مش عارف اعمل ايه ومفيش تليفونات ولا اى حاجة ، لحد ماشوفتو جاى هو والمهندس إبراهيم المعلم".
وتابع:" مسئولى الزمالك رفعوا العرض للمنصورة فقرر عدلى القيعى أن يخفينى عن الانظار وبالفعل نمت عنده فى البيت يومها وقدم الاهلى عرضاً للمنصورة مقابل 350 ألف جنيه وتنازلت عن 30 ألف جنيه مستحقاتى للمنصورة ووقعت فى بيت الراحل العظيم صالح سليم، والراحل طارق سليم لما عرف أنى اتنازلت حباً فى الاهلى قدرنى أوى".
وعن مشواره مع الاهلى قال ياسر ريان :" لعبت 10 سنين فى الاهلى خدت 18 بطولة أغلاهم كانت الحصول على بطولة الدوري سبعة أعوام متتالية ، وكذلك بطولة أفريكا سبورت ، والسوبر مع جوزيه فى بداية قدومه للأهلى، والبطولة العربية".
