البطاقة

يوميات مهندس مشاكس

بقلم: تامر راغب

هما اثنان من اعز واغلي اصدقاء عمري ( وائل ) و ( محمد ) ، كنا نحن الثلاثه لا نفترق ابدا داخل وخارج الكليه .

وفي ايام الامتحانات كانوا بيجوا يبيتوا معايا في البيت علشان نعمل معسكر مغلق قبل الامتحانات .

المهم في اليوم ده نسي وائل شنطه هدومه وهو جاي من المنوفيه واضطريت اطلعله تريننج قديم وصغر عليا فبقى شكله غريب وضيق وكمان لونه اصفر ، مكنتش بحب البسه علشان كان بيحسسني اني داخل السرايا الصفرا .

المهم ادتهوله علشان يلبسه وكان شكله الصراحه يفطس من الضحك .

قعدنا نذاكر لغايه ما الفجر أذن وقولنا ننزل نلف حوالين البيت كده شويه نفك عن نفسنا .

المهم علشان الحظ المهبب ، لقينا عربيه البوكس راكنه علي جمب وعماله تلم اللي معدي .

الظابط : بطايقكم .

انا ومحمد : طلعناله البطاقه .

وائل : انا نسيت البطاقه حضرتك .

الظابط : بصله حتة بصه من فوق لتحت وهو لابس التريننج المهبب السابق ذكره اللي شكله فعلا غريب ، وراح قايله " يعني ايه ماشي من غير بطاقه "..!!!!....وايه اللي انت لابسه ده ؟؟؟؟

وائل : اصل حضرتك احنا كنا بنذاكر عند تامر ده (وطبعا اشار بإيده عليا ) ومبيتين عنده بنذاكر ونزلنا نشم شويه هواء فنسيت البطاقه .

الضابط بصلي كأنه بيسألني عن صحه مايقوله

انا : وبمنتهى الجديه والحزم معرفوش حضرتك

الظابط بص لمحمد وقاله تعرفه ؟

محمد : بنفس الطريقه اول مره اشوفه حضرتك .

الظابط : نده علي المخبر وقاله " شده علي البوكس "

وائل : انفعل جدا ، ووشه احمر ، وقعد يصرخ فيا انا ومحمد ، ياولاد (........) انت وهو
حتودوني في داهيه
انتم بتهرجوا
انا حتسحب علي القسم .

الصراحه مقدرناش نمسك نفسنا من الضحك انا ومحمد ، حتي الضابط نفسه ضحك وطبعا فهم ان كل ده مجرد تهريج بس زياده شويه والحمد لله سابنا نروح بعد ما نشفنا دم وائل .

وبقى كل ما يفتكر الموضوع ده يتنرفز جدا و يقعد يشتمنا
مش عارف السبب الصراحه ..!!!
ده احنا كنا بنهزر معاك ياوائل

اسعد الله اوقاتكم
ودمتم بخير