الترعه
يوميات مهندس مشاكس
بقلم: تامر راغب
ذهبت الي دوله الامارات وانا عندي خمس سنوات .
واخويا اتولد هناك في الامارات ......فعشنا طفولتنا كلها هناك ......وكنا بننزل مصر في الاجازات الصيفيه لمده ٣ شهور فقط .
المهم في الاجازه اللي حصل فيها الموقف اللي انا ححكيه ده..........كنا انا ووالدي ووالدتي واخويا وزوج خالتي الله يرحمه بنتمشي في ( طنطا ) ومتجهين لمنزل خالتي في زياره عائليه .
مديت انا واخويا علي اساس ان احنا نسبقهم .
لقينا الطريق مش كامل وفي ترعه كبيره مليانه زرع اخضر كده .
طبعا لا انا ولا اخويا نعرف ان دي ترعه ولا عمرنا سمعنا ولا عرفنا ايه هي الترعه ولا عدت علينا اصلا من قريب او بعيد .
بصيت لاخويا وقولتله :
انا : احنا لسه حنروح هناك للمعديه البعيده دي ؟ .
اخي : طيب نعمل ايه ؟ .
انا : احنا نرجع بعيد وناخدها جري وبسرعتنا نعدي الحته اللي فيها زرع دي .
اخي : ماشي يله بينا .
طلعنا نجري والناس عماله تتفرج تشوف اتنين مجانين طالعين يجروا باقصي سرعه علي الترعه .
وكان من نصيبي الاغبر اني وصلت لحافه الترعه قبل اخويا .......وهوووووووب .......قفزه من قفزات ماراثون المونديال .......بس لقيت نفسي موصلتش للناحيه التانيه .......ونزلت بثقل جسمي كله في الترعه .
" ثواني بس آخد نفسي علشان كل ما بفتكر بنهج وبتجيلي كرشه نفس وشعور عام بالقيئ "
لقيت نفسي بقع ونازل بتقلي علي زرع ...... فتنيت رجلي علشان امتص صدمه الوقوع ولكن المفاجأه اني لقيت نفسي بغوص في بكابورت
طبعا المنظر كان عالمي .
الناس كلها في حاله ذهول وواقفين متسمرين من هول ماشاهدوا .
واحد معتوه بيجري بعزم ما فيه وبيرمي نفسه في الترعه .
مش بس كده .
اخويا لما شاف المنظر ده ......ضرب فرامل ووقف نفسه قبل ما ينط ورايا ......وشافني عمال اقب واغطس وانا بصرخ " الحقونيييييييييي "
من خوفه عليا ......طلع يجري وهو بيصرخ الحقوا " اخويا وقع في البحر " ....." اخويا وقع في البحر " .
# تاني نرجع لمنظر الناس وهي مذهوله ومتسمرين شايفين معتوه بيرمي نفسه في الترعه والتاني بيصرخ بيقول اخويا وقع في البحر !!!!!!!!
طلع بابا و زوج خالتي يجروا وجابوا ما اعرف عصايه مقشه ولا غصن شجره .......لغايه ما اتعلقت بيه وطلعت من الترعه .
طبعا مش عايز اقول لحضراتكم ......واحد كان رايح زياره لخالته ولابس اشيك قميص وبنطلون وجزمه ......بقول كان.......كان لابس .
طبعا النجيله وحاجات خضره كتير كانت مغطياني من راسي لتحتي وغرقان .....وبشر ميه من كل حته .......والريحه بقي حضراتكم .....حدث ولا حرج .
# تجمهر لم تعهده مدينه طنطا من سكانها في مثل هذا المكان والزمان من قبل .
ولهفه وفضول جامح من الناس لمعرفه سبب ماحدث .
هل دول فعلا ( انا واخي معاتيه ) ولا ده تصوير في احد مشاهد الافلام المصريه .
طبعا زوج خالتي قال للناس المتجمهرين المتعطشين والمتلهفين لمعرفه ماحدث .... "معلشي اصلهم جايين من الخليج وميعرفوش يعني ايه ترعه ".
ضحك هيستيري من الناس كلها..... ودموع من كتر الضحك ......والواحد كان في نص هدومه والله العظيم .
وصلت عماره خالتي وانا علي هذه الحال .....وطبعا علشان موسخلهاش السلم وانا طالع ......جابتلي خيش كتير علشان كل ما اطلع سلمه يحطولي الخيش علي السلمه اللي بعدها بعد ماقلعوني الجزمه والشراب .....وهكذا الي ان وصلت للدور الثالث ومنه للحمام ......وكل اللي انا سامعه زعيق من خالتي وهي بتقول " يالهوي يالهوي " وسختلي السلم والشقه منك لله " .
كل ده وسط ضجيج من الضحك الهيستيري من اولاد خالتي .
( شايفكم يا اولاد خالتي وانتم بتضحكوا علي فكره )
صابون ايه وفنيك ايه اللي يشيل الجلخ ده ......وكل ما اخلص دوش اشم ريحه وحشه ارجع تاني استحمي لما اتبريت حضراتكم .
قضينا الاجازه الصيفيه ولم نجرأ علي الاقتراب من ناحيه الترعه من كسوفنا انا واخي .......لحسن حد يشوفنا ويقعد يضحك علينا من الناس اللي كانت موجوده ساعه الموقف الهباب ده .
ودي كانت معرفتي بمعني الترعه ......بيان عملي لايمكن ان انساه ابدا .
