بوكيه الورد
يوميات مهندس مشاكس
تم اختياري انا وزميل وزميله لي في العمل للسفر لاستلام احدي ماكينات الانتاج من احدي الدول الاوروبيه .بقلم : تامر راغب
تم اختياري انا وزميل وزميله لي في العمل للسفر لاستلام احدي ماكينات الانتاج من احدي الدول الاوروبيه .
وفي رحله العوده ونحن في الطائره ، لقيت زميلتي بتسألني
هي : باشمهندس تامر هي الطياره حتوصل امته ؟
انا : تقريبا حناخد حوالي ٣ ساعات علي الوصول
هي : لا انا عايزه وقت محدد
انا : وقت محدد ازاي يعني وليه ؟
هي : اصل خطيبي وصاحباتي جايين يستقبلوني في المطار لان دي اول مره اسافر فيها بره مصر وخطيبي عايز يعرف ميعاد الوصول بالضبط .
# زميلتنا دي كانت لسه حفله خطوبتها قبل سفرنا علي طول بكام يوم #
انا : في ثواني طبعا جاتلي فكره مقلب جهنميه فقولتلها : " بس انا كده فهمت هو ليه عايز يعرف ميعاد الوصول بالضبط " .
هي : ليه يعني مش فاهمه ؟
انا : علشان عاملك مفاجئه كبيييييره
هي : انتبهت قوي بكل حواسها وقالتلي مفاجئه كبيره ازاي يعني ؟
انا : انتي لسه مخطوبه قبل السفر علي طول وخطيبك جاي يقابلك وهو عارف ان صاحباتك جايين يقابلوكي .
هي : ايوه تمام
انا : يبقي هو جايبلك بوكيه ورد من النوع الكبير علشان يشرفك قدام صاحباتك ويعبر ليكي عن حبه الكبير وانه افتقدك خلال الاسبوع ده .
هي : بجد والله ؟
انا : انتي بتتكلمي في ايه ، هو طبعا لازم يعمل كده
وانا اول ما نوصل حصورك وهو واقف بيديلك بوكيه الورد الكبير ده قدام صاحباتك وقدام جميع المسافرين والناس كلها حتوقف تتفرج علي المشهد العاطفي ده وممكن يسقفولكم جامد كمان .
# زميلتي شردت جامد وابتسامه كبيييييره علي وشها وانا متأكد اني رسمتلها صوره المشهد وهي عماله تشوفه في خيالها وتبتسم الابتسامه دي #
انا : قاطعت شرودها قائلا : هو خطيبك عارف الوان الورد اللي انتي بتحبيها ؟
هي : قعدت تفكر شويه وقالتلي لا ما اعتقدش ياباشمهندس
انا : يبقي كده حيجبلك الوان ورد كتير في بوكيه الورد لو هو مش عارف لون الورد اللي انتي بتحبيه .
# طبعا انا عمال اوصفلها المشهد وهي سرحت تاااااني جامد في اللي بقوله ولقيت تاني ابتسامه سعاده كبيره علي وشها #
كل ده وانا بكلمها بمنتهي الجديه وانا ماسك نفسي وحنفجر من الضحك من اللي بيحصل و حيحصل
لامست عجلات الطائره ارض المطار وبدأت الطائره بالتوقف
انا : اتصلي بخطيبك بلغيه ان الطياره خلاص وصلت وانتي دقايق وحتقابليه
هي : طيب ليه ماهو اصلا مستنيني ؟
انا : علشان يلحق يجيب بوكيه الورد من العربيه ويرتب مع صاحباتك حيقفوا ازاي في نص دايره ويقدملك هو بوكيه الورد قدامهم ، اكيد الترتيب ده محتاج وقت
هي : سرحت تاني وهي بتقول بابتسامه " ايوه صح عندك حق ، وراحت مكلماه ".
خلصنا اجراءات الجوازات ولقيتها بتقولي ياريت ياباشمهندس تصور الموقف وهو بيقدملي الورد ڤيديو كمان .
انا : طبعاااااااا ولا يهمك .
المشهد اصبح كالتالي :
طبعا طالعين من صاله الوصول خطيبها وصاحباتها جايين يسلموا عليها وهي لقت مفيش بوكيه ورد ولا نص دايره ولا الحوار اللي طول ٣ ساعات عماله تتخيله ، ولسه خطيبها بيسلم عليها ، راحت قايله لخطيبها قدامنا بتلقائيه
هي : فين بوكيه الورد
خطيبها : بوكيه ورد ايه ؟
هي : مش انت جايبلي بوكيه ورد علشان تقدمهولي قدام صاحباتي وعاملي مفاجئه
هو : علامات الذهول علي وجهه قائلا : بوكيه ورد ايه ومفاجئه ايه
هي : نظرت باتجاهي وقالت : ايوه المهندس تامر قالي انك لازم حتجيبلي بوكيه ورد كبير علشان تقدمهولي قدام صاحباتي والناس كلها .
طبعا خطيبها بصلي وفهم وقعد يضحك وانا انفجرت في الضحك وهي واقفه مش فاهمه في ايه واحنا بنضحك علي ايه
هو : ياهندسه حرام عليك كده والله
سؤال الي اصدقاء صفحتي الكرام : هو انا ياجماعه مش كنت بقولها الصح ، مش كان لازم برضو يجيبلها بوكيه ورد ولا انتم رأيكم ايه
أسعد الله اوقاتكم
واحذروا مقالب المشاكس
ودمتم بخير
