واقع عجيب
بقلم - أحمد خليفة:
مدرس لغة عربية فى جدة
النفاق الاجتماعي
إن واحد يوم يجيلك بابتسامة ويناديك
بس من جواه قتيلك نظرته تعلم عليك
والغريبة يكون حبيبك
لأ وممكن تبقى فاكره ف يوم طبيبك
إنما بيحقد عليك
لأ وممكن يبقى جارك أو زميل
تبقى فاكر انه راح يحفظ جميل
واما فاجأة تلقى ضربة على القفا
تلتفت تلقى اللي ضربك اختفى
اعترف انك ضحية للنفاق الاجتماعي
النفاق الاجتماعي
تلقى واحد وشه بايش
يبقى عايش قلبه هايش
لونه ييجي ألف لون
مش بعيد انه يخون
أصله مش بيحب خيرك
جاب في سيرتك ويا غيرك
ضربته عملت علامة
خلتك تندم ندامة
إنك انت كنت صاحبه
وان سرك كان مصاحبه
مش حتنفعلك ندامة
من هنا ليوم القيامة
بس لازم بعدها تحاول تعيش بالنفاق الاجتماعي
النفاق الاجتماعي
تبقى لازم تبتسم ويا الجميع
أصل لو قلت الصراحة راح تضيع
لو تقول أنا مش مسامح يكرهوك
لو تمثل أو تغير في الملامح يشتروك
أصلهم عاوزين كده
هو طبعهم كده
نفسهم انك تبين ألف وش ف وشهم
نفسهم انك تسايس حتى لو حتغشهم
إنما لو عشت طبعك
سبت نفسك يوم تطاوعك
راح يقولو عليك ده قاسي
راح يقولو ان انت أصلا مش سياسي
يعني لازم تنحني وتوطي راسك
أو تشوفلك ناس ملايكة تكون مقاسك
بس مش ممكن تلاقي
قول بقى ايه تاني باقي؟
اللي باقي انك تعيش ( في النفاق الاجتماعي )
