فُرصَة

شعر: أسماء كامل

عَندليب..
مشِي عَ الشُّوك
لَجْل يُوصَل لأحبَابُه
وانا..
دُقت الجِراح الوَان
أول مَاقرَّبت..
مِن بَابُه

مِشيتلُه طَريق شَايِك
واشوَاكُه تَعَبِتني
مَالقيتش بَاب مَفتُوح
ولَا إيدُه سَندِتنِي

كَان نِفسي الَاقي الأمَل
قُدامِي طَريِق مَفتُوح
أمشِيلُه لَو حَتىٰ عُمْـر
وألَاقِي حُبُّـه صــرُوح

تِملَا حَيَاتِي بفَرح
واعِيش البَاقِي
مِن عُمرِي..
أسقِيك بِإيدِي الهَنـا
ويكُون..
بِين إيدِيك أمرِي

يَا كَاسِر قَلبي بِزيَادَة
يَا معانِد مَـع أحبَابَك
فَــرَّح في يُوم قُلبَـك
إرسم حُبُّـه..
فِي كتَابَك

هَتلَاقي الدُنيَا قُدَامَك
فَتحَالَك ابوَابهَا
وقَلب صَاين ورَايِد
وصَبيَّة!!
تِتهَنّٰىٰ بِشبَابهَـا

إسمَع كَلَامِي واعقِلُه
يَا لَامِم غُرور جِنسَك
الفُرصَة..
لَو ضَيعتَها!!
مَاتلُومش غِير نفسَك