أما بعد ..
منذ بداية انتشار فيروس الكورونا في مصر والفرق الطبية تقوم بواجبها علي اكمل وجه وبدون اي تقصير مع وجود تخبط وسوء ادارة في الفترة الأخيرة بالأخص وذلك يتزايد مع استمرار الأزمة وعدم القدرة علي التكهن بمعاد انتهاءها في العالم كله مش في مصر بس .. وبالتالي لازم نلاقي حلول منطقية علشان نساعد ونسند الفرق الطبية علشان يقدرو يكملوا.
- العاملون في الحجر الصحي اقل تقدير بيفضلو ١٤ يوم عمل وبعدهم ١٤ يوم عزل عن المجتمع يعني اقل حاجة ٢٨ يوم تفرغ كامل بدون اي عمل خاص .. كان في كلام عن مكافاة بس للأسف يظل كلام والأطباء بشر عندهم التزامات ايجار مسكن وأقساط والتزامات عائلية .. مع العلم ان ما تقدمه الفرق الطبية لا يمكن حسابه مادياً لكن في النهاية دي ضروريات الحياة.
- فترة العزل بعد العمل في الحجر الصحي لازم تكون في مكان توفره الجهة التي يتبعها الطبيب مع التزامها بتوفير احتياجات المعزولين فيه .
- كشف دوري علي الفرق الطبية وعمل تحاليل دورية لهم
- المصابين والمخالطين منهم لحالات إيجابية يجب الاهتمام بهم وتقديم رعاية صحية استثنائية لهم علشان يقدرو يكملو شغل بعد شفائهم باذن الله
- بدل عدوي مناسب واحتساب العدوي إصابة عمل والوفاة بسببها استشهاد.
- وضع حد للتعدي علي الفرق الطبية والمنشآت الطبية والإساءة اليهم وعقوبات رادعة لها.
الضغط علي الاطباء في التوقيت الحالي تحت مسمي الواجب والالتزام المجتمعي خطر حقيقي .. الشهامة والنبل موجودين لكن الاحتياجات الانسانية كمان موجودة .. في النهاية الاطباء والفرق الطبية بشر وكل المهن سامية وده مش مبرر لضياع الحقوق تحت مسميات الواجب والإنسانية ..
عفواً الشكر والأغاني وحدهما مش كفاية ..
بقلم - الدكتورة إيمان سلامة:
عضو مجلس النقابة العامة لاطباء مصر
