حلم كل واحد فينا.. الكاميرا الخفية
بقلم - أحمد خليفة:
مدرس لغة عربية بجدة
نفسي أصحى الاقي نفسي في الكاميرا الخفية
ييجي واحد بابتسامة صفرا يقول : نذيع؟ وانا اقول له ذيع
نفسي حد يقول ان اللي فات مقلب سخيف
وما فيش خداع ولا حد ضاع ولا فيه شتا ولا فيه خريف
نفسي اغمض عيني وافتح تاني اشوف
ان اللي فات حبة ظروف
ان اللي فات زي الكتب ترجع مكانها على الرفوف
ان اللي فات ماضي انتهى
انه صورة غامضة غابت حتى لو أنا عشتها
بس ييجي ابو ضحكة صفرا يقول نذيع؟ وانا اقول له ذيع
نفسي أصحى الاقي الدنيا بقت تمام
ولا فيش آلام ولا فيش ملام ولا ده منين أو ده بكام
ولا فيه حلال ولا فيه حرام ولا مرمطة وغربة وضلام
ولا فيه كلام حزن وأسى
ولا فيه أسامي بتتنسى
فاجأة ييجي ابو ضحكة صفرا يقول نذيع؟ وانا اقول له ذيع
نفسي الاقي نفسي باصحى من الكابوس
ولا فيه مابين الناس فلوس
ولا ناس تدوس ولا ناس تحوس ولا ناس تلوص
ولا ناس يقطع قلبها قلة غموس
ولا ناس تداري في حزنها بشمعة فانوس
ولا فرقة بين كل الحبايب من زمن
ولا غربة تاخد مننا ضعف التمن
امتى ييجي ابو ضحكة صفرا يقول نذيع؟ وانا اقول له ذيع
( ذيع يا عم بس فوقنا من اللي بيحصل لنا ده )
