خواتيم الخير

شعر: أسماء كامل

قَبل ليلتُه بْليلَة قَال
ڤيروس ايه ولّا مكرُوب
ربَّك بيسبِّب الأسباب
وعُمرك عِند اللّٰه مَحسوّب
ادعِيه بَس وأقصُد بابُه
تُوبة قلبَك دا المَطلوب
سِيب خَواتِيم الخِير لعيَالَك
خَليِك بين النَّاس مَحبُوب
مش هَتسيِب مِن عُمرك سَاعة
كُله ياوَلَدي قدَر مَكتُوب
.
جوِّز بنته ولَمْ العيلَه
واقف هيبَه زينة الناس
اتاريه جمَّع لَجل يودَّع
حاسِس إنُّه فايتنا خلاص
.
يابن اخويا وظيفتك عندي
ماتشيلش الهَم انا موجود
اسعى بَس لَجل عيالك
ربَّك لينا بالخير هيجوّد
.
زَرَع النَّخلة قُدام دَارُه
وقال ياعالِم خِيرها لمِين
كان بيصُب الخير لعياله
سبـعة اليّـوم مِتيَتمِين
.
رَن لمَرتُه قَبل المُوتة
خلَّص شُغله خلاص ف الضَّي
وبفَرحِة صوتهَا عشَان مبسُوطة
بَرَكَة ياعُمري إنَّك جَي
.
وكلِّم وَلده فـ المَغربية
قاله يا يُوسف إي الأخبار
هات المكنَة للعموديَّة
أوصَل بيها لحَد الدَّار
.
قاله ياسَندي وضَهري انا جايلَك
ميتىٰ ياقلبي تبقىٰ هناك
قال بمشيئتُه ساعة وأوصلَّك
قـاله ياغالي هستنَّاك
.
وف لَحظة حُكم اللّٰه اتنفذ
بكَّى قلُوب الدنيا عليه
ولآخر لَحظة أنفاسُه بتلفظ
رافع بالشَّهادة ايديه
.
سِبْت السِّيرة الحِلوة لروحَك
كُنت الاب وأخ ووالد
ماكنش في اطيَب مِن بوحَك
دايمًا عَمِّي هتفضَل خَالِد
.
سِيرتك واللّٰه ياغَالي بتلمَع
والخير كَان جواك مَكنون
يا خَالد
" إنَّ العين لتدمَع
وإنَّا لفُراقِك لمَحزُونوّن "