هاتولي بالطو

يوميات مهندس مشاكس

من ذكرياتي في السودان # ٣

بقلم: تامر راغب

لما وصلت السودان امضيت حوالي اسبوع مع مدير المصنع في منزله الي ان وفقني الله ووجدت شقه اسكن فيها .

لكن ثاني يوم ليا في الشغل لما كنت مقيم مع مدير المصنع طلب مني الصبح اني اركب معاه العربيه علشان نروح المصنع مع بعض بدل ما اركب مواصلات .

المهم دخلت لبست هدومي ونزلت معاه

عربيته كانت من العربيات العاليه

وانا لسه بمد رجلي في العربيه

زيييييييييييييييق.

لقيت البنطلون حضراتكم بقي حتتين

وبقيت في نص هدومي مش عارف اعمل ايه

الراجل مستعجل وبيحب يروح الشغل بدري

واحنا نازلين متأخر

اقوله استني حضرتك البنطلون اتفتق واطلع اغير البنطلون

ولا احط لساني جوا بوقي واسكت .

و اخترت الحل الثاني

والله لايوريكم

سرسوب هوا من كل حته .

المهم وصلنا الشغل والمشكله مش عارف اخبي فتحه البنطلون من ورا ازاي

روحت مطلع القميص بره

بس برضو لامؤاخذه مش مغطي المنطقه كلها

والقميص لما طلعته من البنطلون شكله كان مكسر وعايز يتكوي

ومنظري وانا داخل المصنع النهارده كان مبهدل ومخالف تماما ليوم الامس اللي كان اول يوم ليا معاهم وكنت داخل بيه بالبدله وعلي سنجه عشره

روحت رامي نفسي علي اقرب كرسي وقولتلهم بصوت عالي

بالطو

هاتولي بالطووووو بسرعه

لقيتهم بيسألوني في ايه ياباشمهندس

قولتلهم اصل انا اول ما بوصل الشغل ببقي سخن وعايز ابتدي شغل علي طول

وببقي عايز البس البالطو علشان ابتدي الشغل فورا .

طبعا قعدوا يبصوا لبعض في ذهول

ويقولوا في سرهم ايه المجنون اللي اتحدف علينا ده

المهم لبست البالطو والحمد لله اتسترت

بس مدير المصنع شافني اول ما لبست البالطو

وقالي ياتامر البالطو ده بيتلبس جوا في المنطقه الانتاجيه مش هنا

قولتله ايوه ما هو انا عارف

قالي طيب ياابني اقلع البالطو

رديت بسرعه لا حضرتك مش حقدر

قالي يا ابني في ايه فهمني

آخر ما زهقت قولتله البنطلون اتفتق حضرتك وانا بركب عربيتك الصبح

لغايه دلوقتي مش عارف ايه كومه الضحك الهيستيري اللي جاله وانا واقف في نص هدومي

طبعا صمم اني ارجع البيت بالبالطو علشان اغير البنطلون .

إللهي يستره يارب ما يفضحه ابدا

اسعد الله أوقاتكم

ودمتم بخير