ماعنديش طموح.. شعر

ماعنديش طموح آكل ف لحم الأرامل
وتعساء المدن الخاويه م الرجاله
ماجاش ف بالي أنتقم يوم
من كلب عضني
من تاجر غشنى

من كفتين للعدل
دحرجوني ف الهوا

طول باخد كل لكمه والتانيه

وأبتسم قوه

وأبص ع المساكين
يجيبوا لي المتهم

أقول مش هو

وألزقها في ناس تانيين

أوعى تفتكر عياطى ضعف

أنهيار

قله حيله

أنا بعيط علي أهلي الميتين

وازاى يسيبوا عود نعناع وسط

قطاع الطرق

والمجرمين

كل اللي حبتهم
طعنونى بالخنجر

تسألني
كنت تقدر؟

كنت أقدر من غير ماأفكر

أشوه وشهم بنظرتي الحاده

وأقلعهم ضوافر روحهم

بسكينه حاده

لكن.... طلعتهم أبريا

وأوليا ف الشهاده

الكون ماهوش منصف

ولا نضيف

ولايحتمل رسول بيدعي الناس

للإيمان بالشعر

والموسيقي

وعباده رب

بيحب النضافه

والطبطبه علي عوجه المخاليق

وحفظ سر لو حتي من خاين

ياااااه

أنا أتعورت بما فيه الكفايه

وهدومي اتقطعت في خناقه بين أتنين لصوص

وقلبي تعب من كتر تغيير الفصول

وعايز أمشي

بس أروح علي فين

الدنيا صبحت كلها

ميتين ظالمين

لميتين مظلومين

أعيتني كل الحيل

ف نا س مش بنى آدمين

ماعنديش طموح أرد علي حد

يسألني

مين أنتصر علي مين

كلهم.... مهزومين