أنا بحب اصحابي

يوميات مهندس مشاكس

بقلم : تامر راغب

انا واتنين من اعز واغلي اصدقائي كنا لانفترق ابدا في الكليه او خارج الكليه ومازلنا الي الآن علي تواصل .

وكل مايفتكروا الموضوع ده بيبقوا عايزين يضربوني ويفتحوا دماغي من الغيظ .

# كنا بنقعد علي كافيتيريا الكليه نلعب شطرنج او نقعد نتكلم ونضحك

ولا نحضر الا المحاضرات اللي الدكاتره كانوا بياخدوا فيها غياب .

المهم في اليوم ده كنت زهقان وقولتلهم تعالوا ندخل نحضر المحاضره

مرضيوش وقالولي ياعم خليك قاعد معانا هنا

محاضره ايه اللي حتحضرها

الدكتور مبياخدشي غياب ابدا

قولتلهم مش موضوع غياب انا زهقان من القعده هنا

المهم مرضيوش ييجوا معايا وقعدوا يتريقوا عليا
" روح يا متفوق يامحب للعلم احضر المحاضره وابقي سجلنا الحاجات المهمه علشان تشرحهالنا " .

روحت حضرت المحاضره وانا متغاظ منهم الصراحه

والمفاجئه ان الدكتور في سابقه لم تحدث من قبل قرر ياخد غياب في المحاضره دي .

وكل ما ينده اسم يبص يشوف صاحبه

الي ان جاء اسم صاحبي الاول والدكتور نده عليه روحت انا قايم وقايله ده قاعد علي الكافيتيريا حضرتك .

# طبعا الدفعه كلها انفجرت في الضحك لانهم عارفين انه صاحبي جدا .

الدكتور : يعني ايه قاعد علي الكافيتيريا ؟ .

انا : والله يافندم حاولت اقنعه وقولتله لازم يحضر محاضره حضرتك

راح قايلي ان حضرتك اصلا ما بتخدشي غياب في محاضراتك .

# انفجار ضحك في المدرج والدكتور قعد يخبط علشان الكل يسكت .

الدكتور وشه كان كله غيظ ومسك نفسه وكمل نداء الاسماء الي ان جاء اسم صاحبي الثاني

روحت قايم تاني وقولتله ده قاعد علي الكافيتيريا مع الاولاني حضرتك .

# ضحك هستيري من الزملاء في المدرج والدكتور بذل مجهود علشان يسكتهم .

الدكتور : يعني هم قاعدين مع بعض علي الكافيتيريا ؟

انا : والله العظيم
والله العظيم
اتحايلت عليهم يحضروا
ودايما يتريقوا عليا اني بحضر لحضرتك
وقالولي سجل لينا المهم علشان تشرحهولنا

حتي ممكن حضرتك تواجهني بيهم لو انكروا .

# تاني .....ضحك هستيري من الزملاء في المدرج والدكتور قعد يزعق انتم بتضحكوا علي اييييييه .

الدكتور راح معلم علي الاسمين بتوع اصحابي وطلب حضورهم في مكتبه بعد المحاضره فورا علشان يشوف مين دول وطبعا يروقهم في اعمال السنه .

خلصت المحاضره
وطبعا اولاد الحلال ربنا يبارك فيهم من الزملاء والزميلات راحوا يبلغوا اصحابي باللي انا عملته

وطبعا اصدقاء عمري " ربنا يبارك فيهم يارب " مصدقوش وافتكروا ان الناس دي بيوقعوا بينا .

وقالولهم اني استحاله اعمل حاجه زي كده في اصحابي

" وده والله اللي كنت مستنيه منهم بجد
هو ده العشم "

ولما اتأكدوا اني فعلا عملت كده وان الدكتور عملهم استدعاء في مكتبه

قعدت اكتر من اسبوع اصالح فيهم

مع انهم هم اللي شتموني وكانوا عايزين يعتدوا عليا بالضرب لولا اصحاب القلوب الرحيمه زمايلنا حاشوهم عني .

الي اغلي و اعز اصدقاء عمري

بعد مرور كل هذه السنين

بحبكم قوي

السماح بقي
@ Mohamed Desoky
@ Wael Ghazal