دبوس الطرحه

يوميات مهندس مشاكس

نزلت انا ومراتي وابني مشوار من المشاوير التي لاتنتهي . المهم ركبنا العربيه وابتديت اتحرك 

بقلم: تامر راغب

شويه ولقيت ابني (الله يكرمه يارب ويحفظه ليا قادر ياكريم ) وهو قاعد في الكنبه الخلفيه في العربيه

بيقول بأعلي صوته :

ابني : ماما هو دبوس الطرحه ده بتاعك ؟

مراتي : تلتفت في حده علشان تمسك دبوس الطرحه وتقولي بصوت كله تهديد ووعيد
بتاع مين دبوس الطرحه ده يابيه.

انا : ضربت فرامل بكل قوه وركنت علي جمب

قعدت ابص علي الدبوس واخيرا قولتلها والله العظيم ما اعرف .

مراتي : مين ركبت معاك العربيه ياتامر .

انا : وحياه الست الحاجه امي ما في وحده ركبت معايا العربيه .

مراتي : يعني دبوس الطرحه ده جه لوحده هنا في العربيه .

انا : والله العظيم انا ما اعرف ازاي ياحبيبتي
يمكن السايس وهو بينضف العربيه .....

"من غير ما اكمل كلامي قاطعتني"

مراتي : سايس مين يا ابو سايس .

وكانت خروجه غبره بعيد عنكم .

وقعدت علي الحال ده مايقرب من خمسه ايام .

عافاكم الله كل يوم بعد ما ارجع من الشغل يكون في قعده عرب واستجواب

مين ياتامر اللي ركبت معاك العربيه .

وانا ثابت ثبوت الجبال ولا اغير اقوالي

والله العظيم ما اعرف مين صاحبه دبوس الطرحه .

لغايه ما جه يوم بعد الخمسه ايام العجاف كنا بنزور والدي ووالدتي واذ بأمي تسألني امام مراتي

امي : تامر ، هو انت ملقيتشي عندك في العربيه دبوس طرحه كنت فكيته وانا معاك في العربيه ونسيته ؟

مراتي : ايوه ياتانتي
تامر لقاه وانا شايلاه لحضرتك

انا : موجها كلامي لمراتي "هو انتي كنتي عارفه ان دبوس الطرحه ده بتاع ماما !!!!!!!

وعامله نفسك مش عارفه دبوس الطرحه ده بتاع مين وكل يوم نكد واستجواب "

مراتي : الصراحه ايوه كنت عارفه
بس قولت اضغط عليك يمكن تقر وتعترف
يمكن تكون عارف واحده من ورايا .

طبعا مش عايز اقولكم علي النار اللي كنت فيها

ووالدتي ووالدي والجيران كانوا مكتفني وانا بصرخ و بأحاول اوصل لمراتي وهي عماله تضحك .

حسبي الله ونعم الوكيل
ان كيدهن عظيييييييم

أسعد الله أوقاتكم
ودمتم بخير