"بتتعاملى ازاى مع الضيوف اللى بتدخل الشقة بالشوز؟" .. سؤال على الفيس بوك.. واجابة: "احسن من ريحة الشراب!"

كل ربة منزل تكون حريصة على تنظيف شقتها بشكل دائم.. ومهما تسبب لها ذلك فى الشعور بالارهاق فانه أمر لابد منه.. لكنها تكون حريصة ايضا على الا يفسد احد مظاهر النظافة هذه.. خاصة السجاد

لذا فموضوع خلع الحذاء قبل المشى على السجاد يعد من الامور التى يحرص عليها اصحاب البيت او الضيوف، لكن بعض من هؤلاء الضيوف لا يراعى ذلك ويدخل البيت بحذائه فماذا تفعل ربة المنزل؟

كان هذا هو السؤال الذى وجهته احدى العضوات بجروب دندشة على موقع التواصل الاجتماعى فيس بوك " بتتعاملى ازاى مع الضيوف اللى بتدخل الشقة بالشوز؟"

وتنوعت الاجابات بين ردود ساخرة او اقتراحات حقيقية نذكر بعضها

- عادى فيها ايه مش احسن من ريحة الشراب.

- بجيب المقشة واكنس قدامهم واكسفهم.

- اقطعي رجله ع طول انتى لسه هتسالي

- بركبلهم الوش الخشب ولو مفهموش من نظرتى ليهم بشتم.. ده كله الا السجاد.

- خليهم يكنسوا السجادة زى ماوسخوها

- حطوا دواسه قدام الباب والداخل هيمسح جزمته اكيد قبل ما يدخل
- يعني هتقلعي الضيوف الجزم شكلها وحش اوي انا لو حد عمل معايا كدة هاخد جزمتي وامشي

- هو المفروض غلط علشان خاطر البيت بيتملى جراثيم بسبب دخول بالجزم بس بردوا صعب تقلعى كل واحد داخل جزمته يعنى فهو يدخل ونضفى بعدها وخلاص

- بس يجيلنا ضيوف وانا ادخلهم بالجزم يبرطعوا في الشقة
معدش حد بيزور حد و لا حد بيسأل علي حد

- بقف ع الباب بقلعهلهم قبل مايدخلوا

- بتضايق جدا الصراحه حاجه رخمه اوى

- يافطة حلوه كده مكتوب عليها ممنوع دخول الاحذيه

- بيتحرق دمى هعمل ايه مينفعش احرجهم

- بقولهم اقلعو الجزم بطريقه ظريفه كده

- بندب بعد مابيمشوا

- بقول لو سمحتو اخلعوا الجزم برا قدام الباب

- بقول لاى حد خلقه ربنا اقلع بره

- معرفش ليه شايفنها عيب لو قولتوا بابتسامه معلش ممكن تقلعوا الشوز عادي يعني بقول كدا وبيقعلوا من غير اي احراج اصل بيبقي كسل منهم بس

- بقولهم بعد اذنكم اقلعو برا علشان احنا بنصلي في كل مكان في البيت وبس

- خليهم يغسلوا مكان ماداسوا

- هاتي مفارش سجاد بلاستك كده بتتحط حلوه اوى

- بهدوء كده بقولهم يا جماعه بعد اذنكوا في جزامه ع الباب اخلعوا الجزم برا مش عيب علي فكره

- بقفلهم ع باب وبقولهم اخلعوا جزم بره او هنا جمب الباب

- حطي جزم على عتبة البيت هيشوفوها ويفهموا بس تكوني محضرة شباشب يلبسوها

- هقول ايه ؟؟بتحرج طبعا مع انى بكون متضايقة جدا.

- انا لو حد قالي اقلعي الجزمة هلف وامشي و عندي مبرضاش اخلي حد يقلعها دي قلة زوق المفروض ان المنطقة المخصصه للضيوف بتبقي عامله حسابك انهم هيدخلوها بالجزم

- متعمليش حاجه أكيد ده من الذوق عندهم ولو دخلوا بيها مش مشكله أكيد مش هيدخلوا الشقه كلها لنا ينزلوا اكنسي ما كان ما دخلوامش ازمه يعني

- قوليلهم عادي بس جبيها بهزار وكده عشان محدش يتحرج يا ما تجيبي مفارش سجاد بتتباع وافرشيها علي السجاد وبعد ما يدخلوا وتدعك شليها وقوليهم معلش بس حطاه عشان السجاد ميتوسخش من الشوزات و اكيد لو عندهم دم هيحسوا

- ببقي علي اخري بس بتحرج احرج حد

- عادي الضيف مقدرش اقوله حاجه

- بدعي عليهم بس عشان طول ماهما ضيوفي وف بيتي مقدرش اجرح اي حد فيهم

- عادي هما الضيوف مش عندنا كل يوم عشان نقولهم اخلعوا الجزم لو حد دخل عادي وبعدين البيت يتنضف ايه المشكله.

- والله عيب جدا انك تحرجي حد طالما دخل بيتك خلاص يبقي واجب عليكي تحترميه

- انا معنديش الكلام ده بقف ع الباب اقول اقلعو الجزم بره احنا مش نقصين مرض من الشارع اللي يزعل معدش يجي

- ايه المشكله يعني ضيوف شويه وماشين نكرشهم ومش من الاتكيت ان الضيوف يقعلوا جزمهم بره

- ممكن بشكل شيك وانتى بتفتحى الباب علشان الاستقبال ..ضحكه و انتى بتقوليلهم ممكن تسيبوا الجزم هنا وتحددى المكان و ممكن تجيبى مثلا الجزامه الصغيره دى و تخليها جوه لو هما بيخافوا على جزمهم...و الناس اللى بتفتكر الموضوع ده بيئه و كده

- بقولهم لو سمحتو الشوزات بره