هاتلي كوتشي

كراكيب أميرة

بقلم: أميرة الزيات

سهل جدا علي اي بنت انها تلعب رياضه وتحافظ على جسمها وعلى لياقتها..
بس ياتري سهل على الزوجه ام العيال؟؟ طب و رأي الزوج ايه؟!
بيوافق..بيرحب ..ولا بيعارض
ويقولها ما خلاص بقيتي ام العيال..!
تعالوا نشوف حوار بين زوج وزوجته لما طلبت منه إنها تمارس رياضة حصل إيه..!؟

=هاتلي كوتشي

-بتقولي إيه ؟!

=هاتلي كوتشي

-و عاوزاه ليه ؟!..كوتشي إيه بس (ياوليه)..خشي أعملنا محشى و شوية ملوخية
واهدى شوية عليا.. إنتى فاكرة نفسك لسه في الثانوية!

=و إيه المانع هعملك كل اللى تعوزه وتقول عليه.. من عنيا.. بس بأقل دهون وشوية مفهومية .. دا المرض غدار ملوش غالي ولا بالمحسوبية

دى بنتى بتقولي لعبينى يا ماما بنهج قبل ما أخطى الأوضه ديه من كتر الدهون اللي بقت فيا!!
وأنت تقولي أوعي تنسي تحطي الزبدة اللي هي..!؟

دا وجعي مش هيبقى ليا.. ده لكل البيت وأنت أولهم يا عنيا
دي جارتنا خست بعد ما وصلت المية وتشوفها تقول دي بقت صبيه!!

-صبيه؟!

إستني إستني عليا..!!
ايه غيرتي يااحسان ؟!, دا كل دا كلام نسوان والغيره بتبان ..كنت فاكرك عندك مفهوميه؟
خشي خشي اقلعي الإسبورت دا والبسيلك أي جلابيه دا خلاص يااحسان دانتي بقيتي ام العيال وهي دي المسؤلية
وجوزك راجل غلبان ملوش في دلع النسوان، مش تقوليلي عاوزه ابقي صبيه..!
ألا قوليلي كمان مش عاوزه تخدي ميدالية!!
برونزيه ولا فضيه؟؟
تكنشي هتخدي الدهبيه .. اتجننتي خلاص ياوليه..!!
كفايه كفايه تفاهات دانا طلعان عيني من الفجريه..
ومتزعليش ياستي انا شايفك احلي صبيه.

=اهدي كدا شويه وحلمك بس عليا كل دا علشان قولتلك هاتلي الحاجه ديه؟!
تقولي إشي برونزية ودهبية وفضية هو انا لازم أخدلك ميدالية؟
وبعدين وهي شويه عليا!!
دانا طول عمري اد المسؤلية وإسال عليا..!
وماتقوليش تفاهات، إنتوا اللي خلتوها منسيه..!
انا عاوزاك تهتم بيا وما تجيش يوم تتريق عليا؛ لوعديت الميه مش هتقدر تاخد بإيديا ولا هقدر أنولك كوبايه المايه
انا خايفه على العيله ديه.
مش هينقص من روجلتك شئ.. ولا هسيب المسؤلية.. ولا شغلك هيتاثر ولا هيقولو جوزها بيجريها الصبحيه..!
دول هيغيرو منك ويقلدوك لما يشوفوا السعاده اترسمت جوة عنيا. واني بقيت صبيه..مش حببني صبيه؟؟!
-طب واللي بيجرو في تراكك هايعكسوكي..! دول بدل الواحد ميه؛ وانا طبعي حامي مليش في الشمال..دا إنتي أم العيال؛ لا هطبطب علي توتو ولا ها أقول ابعد عن احسان
دانا هكسر كل الحي وانتي ادرا بيا فهماني يا صبية؟

= هيسكتوا صدقني هيسكتوا وها يساعدوني ومش بعيد يحموني؛ لما يلاقوني مصممه وهدفي قدام عنيا..بس انت هتلي كوتشي..!
عاوزه كوتشي علشان اجري بيه وابتدي المشوار اول ماحط رجلي فيه .
ها........