هوية الكنافة..

#سمواتي

الكنافة من أكتر الحلويات اللي مرمية طول السنة ومبتتألقش غير في رمضان، بس في حديث مطول مع أبي الحبيب بقوله بابا تاخد كنافة بالنيوتيلا

بقلم: سماء عماد

الكنافة من أكتر الحلويات اللي مرمية طول السنة ومبتتألقش غير في رمضان، بس في حديث مطول مع أبي الحبيب بقوله بابا تاخد كنافة بالنيوتيلا، بصلي وقالي كنافة ايه اللي بالنيوتيلا؟ يا بنتي حتى الكنافة بقت مايعة هيا في حد ذاتها كانت مفروض انها حاجة حلوة بيتحط عيها شربات ازاي بقت جزء من حجات حلوة تانية كتير..مكنش في أحلى من كنافة أمي الله يرحمها تقلبها في شوية سمنة في صنية عالنار مع شوية زبيب ومكسرات وشربات وخلاص وكانت أطعم بكتير..

حتى الكنافة يا حبيبتي بقت شبهكوا وشبه ايامكو..

حسيت نفسي اقولوا شبهنا وشبه أيامنا؟؟ أومال لو صدمتك وقلتلك ان بقى اسمها baby hair هتقول ايه بس يا حبيبي؟!
بصراحة لقيت ان عنده حق، احنا كل حاجة عندنا بقت Fake وملهاش طعم، تخلينا عن كل ما هو Original في حياتنا وبعدنا عن البساطة حتى في الكنافة أنا اه بشكل شخصي بحب كل الحلويات والافتكاسات بس فعلا كنافة ايه اللي باللوتس واللي بالأوريو واللي ريد فيلفيت واللي بالمانجا واللي بالموز واللي بالتمر واللي كنافة فخارة وكنافة بالرز بلبن والايسكريم وام علي والبسبوسة و و ويعني Nola قايمة بالواجب وزيادة... صحيح هوا ايه العك ده؟؟

قياسا علي الكنافة بقى كل حاجة في حياتنا، لا رمضان بقى نفس رمضان ولا الفوانيس حتى ليها نفس البهجة والروح والشمعة، بقت ماسخة ومملة وبلاستيك جدا منغير هوية، ولا مسحراتي ولا لعب وبراءة ولا حتى راحة بال!!

كل حاجة قديمة وكل حاجة زمان كانت أحلى وكانت حقيقية أكتر، من مناسبات للمة عيلة لطموح لتواصل اجتماعي حقيقي بمقابلات حقيقية وجوابات بعبارات ومفردات حتى راقية ومختلفة مكتوبة بخط الإيد، وقفة الناس جنب بعض وحب الخير مش على الملأ و بلم تبرعات وشحاته عالتلفزيون عيني عينك، بمسلسل تتلم العيلة تتفرج عليه من 10000 مسلسل كلهم شبه بعض، لسفرة فيها صنفين تلاته بياكلو عليها 100 واحد وبتكفي ويفيض، لوقت كانوا بيعرفوا يستمتعوا بيه منغير لا موبايلات ولا سيلفي وسناب وانستاجرام..

محتاجين نرجع نحس تاني، محتاجين نعرف نعيش كل حاجة زي ما هي منغير هري كتير..

بس بردو بحب الكنافة بالنيوتيلا