رمضان ومرضى السكر
رمضان بالنسبة لمرضى السكر بيكون مشكلة ودايما بيبقى فيه أسئلة كتيرة بتتكرر .
بقلم -د. أيمان عبد الرحمن:
طبيب بشرى
رمضان بالنسبة لمرضى السكر بيكون مشكلة ودايما بيبقى فيه أسئلة كتيرة بتتكرر .
هل مريض السكر ينفع يصوم في رمضان ولا الصيام مشكلة بالنسبة ليه ؟! ولو صام ازاي يقدر يظبط أكله وأدويته مع الصيام بحيث يقدر يتفادى أي مشكلة ممكن تحصل لو لغبط في مواعيد أدويته وأكله ؟!...
- الحقيقة مش كل مرضى السكر يبفع يصوموا في رمضان لأن في مرضى لو صاموا دا هيسببلهم مشاكل وسكرهم هيتلغبط وهيدخلوا في غيبوبة .. ومرضى تانيين حالتهم بتتحسن في رمضان نتيجة لأن حالتهم تسمح ليهم بالصيام وبالتالي قدروا يستغلوا الشهر دا انهم يمشوا على نظام غذائي سليم ويظبطوا الأدوية بتاعتهم ...
طيب دلوقتي امتى هيكون مريض السكر مسموح ليه الصيام ؟!..
- مريض السكر مسموح ليه الصيام في 3 حالات :-
1) لو هيقدر يظبط جرعات الأدوية بتاعته بحيث انه هياخد نفس الجرعات اللي كان بياخدها طول الأيام العادية ...
2) لو قدر يمشي على نظام غذائي مظبوط يسمحله ان جسمه يحصل على كل العناصر المطلوبة ليه من غير ما يحس بأي تعب أو مشاكل ...
3) لو كان المريض مش بياخد أكتر من جرعتين أنسولين في اليوم ...
-لو قدرنا نظبط الحاجات دي عند مريض السكر فهو بكدة يقدر يصوم عادي ...
وامتى يكون ممنوع الصيام على مريض السكر؟!..
- دول بقى حالات كتير ممنوع عنها بشكل نهائي :-
1) مريض السكر من النوع Type 2 وحالته متقدمة .. بمعنى انه في مرحلة المضاعفات ...
2) مريض السكر من النوع Type 1 وبياخد 3 جرعات أنسولين أو أكترفي اليوم...
3) المريض اللي دايما مستوى سكره أعلى من 300...
4) الحامل أو المرضعة وعندها سكر...
5) المريض اللي دايما بيتعرّض لنوبات من انخفاض السكر على الرغم من انتظامه على العلاج ...
6) المريض اللي اتعرض لغيبوبة سكر قبل رمضان ب 3 شهور ...
7) الأطفال المصابين بالسكر...
8) العمال اللي شغلهم بيتطلب مجهود جامد وهما عندهم سكر...
وبما ان من الوارد انه يحصل مشكلة للمرضى اللي هيصوموا ..فايه اللي لو حصل يخليني أخد القرار ان الناس دي مش هتكمل صيام؟!..
1) لو حصل زيادة في مستوى السكر عن 300..
2) لو حصل نقص في مستوى السكر عن 60..
3) لو انخفض مستوى السكر عن 70 خلال الساعات الأولى من الصيام...
4) لو حصله أي عرض طارئ خلال الصيام ...
-وقتها هناخد قرار ان المريض دا مش هيكمل صيام الشهر الكريم ...
