حاجة حلوة رغم المرار
طريق السعادة
د. هالة منصور.. أستاذ علم الاجتماع
ناس كتير بتحكي وتتحاكي علي اللي فات وعلي اللي كان وتقول كتير وتعيد كتير وتعيش حكايات نكد شوية وفرح شوية وتعب كتير وذكريات علي ذكريات وآلام كتير وتحميل تقيل علي الزمن وعلي اللي راح وعلي اللي كان وتقول في شكل حكايات منها العبر جوا التاريخ يطرح أمل يصور ألم يعيشك إحساس قديم وكأنه لسة معانا حالا بفرحه بقي أو حتي جرحه المهم يكون عبر وتقول حكاوي للي يفهم ويتعلم ويكون بجد علي الحب قادر يعيش بحب يتكلم بحب يتعلم بحب ويعلم برضه بكل حب ماهي الحياة بين هات وخد بتمر بينا في حكاية حلوة أو كلمة حلوة أو حتي في لمسة حلوة أو في ابتسامة تفتح طريق لأي حد يكون صديق يحس بيك يخاف عليك وساعة الجد تلاقيه واقف في صفك بيقوي ضهرك يسند كسرتك ويمسح دمعتك ويقولك إنت حاجة حلوة رغم المرار إنت إللي جنبي في كل موقف إنت إللي ساند إنت إللي واقف إنت المدافع عن الحبايب عن الصحاب بكل قوة.
العيشة إيه غير لمة حلوة نحس بيها ونعيش عليها أيام كتير بين ذكريات أو أمنيات نتلاقي تاني ونعيشها تاني ونخطف حلاوة ضحكة فاتت فنبتسم ونقول ياريت كانت تدوم. ماهي الحياة يوم ويوم. يوم حلوها يبقي منور. يديك أمل. يديك حياة مع طاقة حلوة وتقول خلاص الحلو جاي بس ساعات ييجي برضه الألم. ويكون وجع لو من حبيب نسي المحبة وبقي يدور علي الأذية. علي الألم علي الوجع ودايما يقول إنت السبب وأنا البرئ ينسي المحبة وينكر جميل ينسي المودة ويبقي دايما في المشاعر جاحد بخيل وحتي يشكي من وجع في دوسة علي الكف بمحبة وبعشم ويقول وجعلي ايدي ويتهم ويفتري وأصله وفصله وبسرعة يقف عند العيوب وينسي المحبة وياريته صح ده ساعات بيبقي تأويل وخلق وتهيؤات تلاكيك كتير تبقي حكايات.
ساعتها بقي تبقي الحياة صعبة مع إنها في الأصل سهلة بس إحنا إللي فقدنا الصديق وبعدنا جدا عن المحبة وغرقنا في كل حاجه فيها صعبة وكلامنا بقي بكام وليه ونسينا إن حاجات كثيرة اعمق واكبر من اننا نسأل عليها نحسها نحبها نعيش عليها من غير سؤال من غير جدال هي كدة حلوة كدة بالحب نحيا بالحب نفرح بالحب نسعد في الحياة.
فوقوا بقي واصحوا وسامحوا واختاروا صح. حبوا صح. وابعدوا عن الناس الغلط. هتلاقوا سكة السعادة في المحبة. في التسامح. في التراجع . في التباسط .في التواضع. وساعات بتبقي في التجاهل. والتغاضي والتباعد. والترفع والتعالي. المهم حافظوا علي الصداقة .والسلام والمودة والرضا. تلقوا السعادة ومعاها برضوا هييجي الرضا . وللحديث بقية إن شاء الله.
