عمرو أديب عن خسارة الزمالك أمام الأهلي بالسحر: ماروحناش الماتش

حذّر الإعلامي عمرو أديب، من انهيار شامل لنادي الزمالك، وذلك بعد هزيمته من الأهلي برباعية مقابل هدف فى مباراة القمة بالدوري المصري الممتاز.

وأكد عمرو أديب خلال برنامجه "الحكاية" عبر شاشة "mbc مصر"، مساء الجمعة: "الزمالك بينتهي.. يا تلحقوا يا مش هتلحقوه.. إحنا رايحين في سكة اللي يروح ميرجعش.. لو الوضع استمر كده هنبقى زي الإسماعيلي (ينافس على الهبوط) السنة الجاية".

وأضاف عمرو أديب أن رواية خسارة الزمالك أمام الأهلي بالسحر لا فائدة منها، متابعا: "إحنا ملعبناش حاجة ولا روحنا الماتش.. مكنش فيه روح ولا خطة ولا فرقة".

وتابع عمرو أديب: "فرقة إيه اللي هتلعب لما يتقال للاعب إنت كنت جاي النادي بالشبشب.. أنا حاسس إن الزمالك متساب للسقوط الحر".

وأشار: "مشفناش محمود الخطيب طلع مرة قال لحسين الشحات أنت كنت جايلي بالشبشب أو بتشرب مخدرات".

ولفت: "البشوات بيصدورا للناس إن فيه مؤامرة على الزمالك.. خلينا بقى في المؤامرة لغاية ما نموت وميكنش فيه نادي أساسا".

وأكد أنّ الأنباء عن تعاقد الأهلي مع إمام عاشور لاعب الزمالك السابق، هزّت القلعة البيضاء بالكامل، لكنّه تابع: "الأهلي تعاقد مع إمام عاشور بمنطق دعه يعمل دعه يمر.. اللاعب غلط وشتم لكنه ميقصدش ومحصلش حاجة.. لكن ده لو رمضان صبحي كانت الدنيا بقت حاجة تانية".

وحقق الأهلي فوزا كبيرا على الغريم التقليدى نادى الزمالك برباعية مُذلة،فى المباراة التى اقيمت بينهم على استاد القاهرة الدولى، ضمن الجولة المؤجلة من الاسبوع 31 من مسابقة الدوري المصري الممتاز.