إحنا محتاجين إيه؟

طريق السعادة

د. هالة منصور.. أستاذ علم الاجتماع

إضحك كركر اوعي تفكر. حلوة الدنيا زي السكر .. حلوة الدنيا فعلا لو عاوزين نشوفها حلوة . هي حلوة ساعات و صعبة ساعات. لكن هو في حاجة ثابتة مش بتتغير؟ وإحنا لازم نسعي دايما ونحاول نغير. ندور علي اللي يسعدنا بجد مهما كان. ساعات بيبقي في راحة بال أو وفرة مال. في كلمة حب. في إحساس بأمان. في نظرة رضا. في لمسة حنان. في تميز .في نجاح. أو حتي في إسعاد إنسان.

افرح. عيش. إرضي. واوعي تدخل سباق الحياة بعنف . لأن التوازن هو ناصية السعادة. وافتكر دايما إن أي شئ لو زاد بيتعب. حتي الفلوس لو زادت بتتعب. حلاوتها لما اللي يجيلك علي قد اللي يكفيك وتصرفه بسعادة. وأول ما تبدأ تحوش بتتحول لخادم ليها. خايف عليها. عاوز تزودها. مشغول بيها.

حتي الأكل لو زاد يتعبك. . والنوم لو زاد يتعبك ويحسسك بالملل والوخم والكسل. والحب والاهتمام لو زاد بيخنق والراحة لو زادت تتعب والخوف لو زاد يجنن.علشان كدة لازم ندور دايما علي نقطة التوازن ونفرح ونسعد ونرضي ونعيش بتوازن علشان حياتنا تظبط وتبقي احتياجاتنا مجموعة أشياء متوازنة ومتكاملة مش مادية فقط .مادية واجتماعية ونفسية وإنسانية ومهنية و شخصية وعامة وساعتها هتتفاعل مع بعضها في كوكتيل جميل وساعتها هنقدر ندخل سباق الحياة بقوة وتركيز ووضوح لأهداف مهما كانت بسيطة لأننا هنقدر نطمن ونرضي ونحدد بوصلة السعاده.

دايماً السعادة في الرضا مش السلبية. في التوكل مش التواكل إللي بيدينا الطاقة الايجابية ونعرف عن طريقها نحدد سرعة سباق طريق الحياة بعد ما نسأل نفسنا بصدق سؤال مهم: إحنا بجد محتاجين إيه؟ وإيه إللي يسعدنا حقيقي ونحاول نحققه بتوازن وجهد ورقي وإنسانية وايمان وتفاؤل ومحبة لكل اطرافنا في الحياة.. أهلنا. جيرانا. زملاءنا. قياداتنا. وساعتها هتبقي بجد حلوة الدنيا زي السكر وهنعرف نضحك من القلب ونكركر مهما كانت الصعاب والتحديات ونقول دايما بكرة بإذن الله هتتعدل.. وللحديث بقية إن شاء الله.