ميدو: مش طبيعي الشناوي يتحول من سوبر مان لحارس معندوش فكرة

انتقد الإعلامي أحمد حسام ميدو، الهجوم على محمد الشناوي حارس مرمى الأهلي، مشددا على أنه في حاجة إلى الدعم بالوقت الحالي.

قال ميدو في تصريحات تليفزيونية: "مش عجبني اللي بيحصل للشناوي من انتقادات خلال آخر 48 ساعة، قولنا إن الشناوي مش مركز وعنده أخطاء لكن ده مش معناه إننا نطالب باستبعاده ونقسو في الانتقادات".

وأضاف: "الشناوي أفضل حارس في مصر دلوقتي، ولازم نحافظ على اللاعيبة بتاعتنا، مش طبيعي إن الشناوي يتحول من سوبر مان لحارس معندوش فكرة".

وتابع: "الشناوي اترفع للسما بعد ماتش الذهاب ضد صن داونز وفي الماتش اللي هناك نزل الأرض، لازم يكون في توازن في التعامل معاه، ده حارس مرمى منتخب مصر الأول، ولو الأهلي أو منتخب مصر خسروا الشناوي هيكون في أزمة".

واختتم قائلًا: "بقول لجمهور الأهلي عندكوا حارس كويس جدا، الشناوي يحتاج للدعم في الوقت الحالي".