زوجة تتخلص من زوجها حرقاً بالشرقية
أقدمت زوجة في العقد الثالث من عمرها ببلدة الـ "مجففة" دائرة مركز ديرب نجم بمحافظة الشرقية، على التخلص من زوجها حرقًا دون أن تأخذها به شفقة ولا رحمة ووقفت تستمع لصرخاته وتشاهد نيران الموت وهي تحاصره.
قال "أحمد خالد" شقيق المجني عليه: "أخويا «محمد » عمره 30 سنة متزوج من 12 سنة، وزوجته اسمها «عزة» في نفس العمر، وارتبطوا ببعض عن حب، حتى أنها تركت خطيبها بعد أسبوع علشان تتزوج أخويا، وربنا رزقهم بطفلين، ومش مخليها محتاجة أي حاجة وخلافاتهم دايما زي أي خلافات بين أي زوجين، لكن اللي حصل مع أخويا إحنا مش قادرين نصدق ليه تقتله وتحرقه بالبنزين مفيش سبب يخليها تعمل فيه كده، لو هي مش عايزاه كان ممكن تطلب الطلاق أو تخلعه".
وتابع "دخلته الأوضة وقفلت عليه بعد ما رشت 6 زجاجات بنزين في كل مكان، وفي الفترة الأخيرة قبل الواقعة بـ3 أيام كان دايما يقولي معدتي بتتقطع شوفلي حل وأنا كنت عايز اكشف عليه، وده أكبر دليل إنها كانت بتحطله حاجة علشان تسممه، أما عن الخلافات اللي كانت بينهم دايما هي إنها كانت دايما بتطلب فلوس زيادة أكتر من اللي بتاخدها منه ومن والده ووالدته، وهو كان شغله في القاهرة لأنه فاتح كافيه في شبرا، وهي عايشة في بيت لوحدها ومعاها ولادها في بلدنا "المجفف".
أضاف شقيق الضحية، "الجريمة حصلت في عز الضهر الساعة 2، وهي اعترفت ومثلت الجريمة أمام النيابة، ومع العلم المتهمة متزنة نفسيا ومفيش أعراض تشير إنها تعاني من أي شيء، لكن هي كل الحاحها دايما عايزة فلوس، وأخويا كان بيحبها جدا وبيعمل لها كل شيء هي بتحبه وعندهم ولدين 7و6 سنوات".
تمكنت الأجهزة الأمنية بقيادة العميد شريف الحملي مأمور مركز ديرب نجم، والرائد رمزي أبوزيد رئيس المباحث من القبض على المتهمة التي اعترفت بالواقعة وأن السبب، وبإخطار اللواء محمد صلاح مدير أمن الشرقية أمر بعرض المتهمة على النيابة العامة، التي أمرت بدورها بحبسها 4 أيام على ذمة التحقيقات.
أكدت التحريات الأولية وجود شبهه جنائية وراء الحريق وبالفحص تبين قيام زوجة المجني عليه "عزة ع" بارتكاب الواقعة بسبب وجود خلافات زوجية بينهم.
وأضافت التحريات أنه قبل الحادث بيوم حدثت مشادة كلمية وخلافات أسرية بين الزوجة والمجني عليه زوجها قامت على أثرها بإحضار زجاجات بنزين وقامت بإشعال النيران بالشقة خلال تواجد زوجها به.
