رامى صبرى: كورونا خدمت "حياتي مش تمام" وكنت فاكرها وقعت

أكد النجم رامى صبرى انه كان يشعر بالخوف من أغنية "حياتى مش تمام" فى البداية لأنها كانت بعد ألبوم فارق معاك 2019.

وأضاف رامى صبرى: "اجتمعت مع عزيز الشافعى وقلتله أنا عاوز أعمل أغنية وقالى على أغنية حياتى مش تمام، وعجبتنى بس حسيت إنها مش شبهى، وقولتله هاجربها وغنتها عندى وسمعتها لأصحابى وزوجتى واهلى، وكل لما حد يسمعها يقولى جميلة، غير لما تعمل أغنية ومحدش يقول حاجة".

وتابع رامى صبرى: "أنا بحب الجراءة في الأغانى وبقول مش هاخسر حاجة، ونزلت الأغنية وبدأ فيروس كورونا، وقولت خلاص الأغنية وقعت، ولكنى تفاجأت أنها من 3 ملايين طلعت إلى 30 مليون مشاهدة في شهر واحد، واكتشفت إن في تريند احنا خاصمنا الشوارع، فبجد كورونا ساعدتها بشكل مش طبيعى".