الأزهر بالمنيا يقدم نصائح عن كيفية تعليم القرآن الكريم للاطفال
قام اسماعيل محمد منسق عام المنظمة العالمية لخريجي الأزهر بالمنيا بتقديم نصائح تربوية عن كيفية تعليم القرآن الكريم للاطفال وقال ان الاهتمام بتحفيظ القرآن مهم جداً للأطفال ، بس لو أنا طفلي عنده أي إضطراب أو تأخر لغوي (إضطراب يعني التشخيص بيعتمد علي الأعراض و العلامات و مفيش فحوصات بتتعمل للتأكد من التشخيص ) لازم أحذر جداً.
اغلب الأضطرابات و التأخير اللغوي المتوسط الي شديد بيبقي ملكه الترديد و الحفظ عالية بالمقارنة بملكه الفهم....و إصرار الأهل علي حفظ القرآن بيفاقم الوضع.... لأن الطفل مش بيبقي فاهم هو بيردد إيه!!!!
و عشان كده في حاجات ممكن نعملها لأطفالنا ال متشخصين بأي إضطراب أو تأخر نعلمهم القرآن و ف نفس الوقت ننمي عندهم ملكه الفهم:
- لما نقعد الطفل قدام الشيخ نمتنع إننا نقول "اقعد عشان تسمع كلام ربنا" الطفل بيفتكر أن المحفظ ده هو ربنا...الأنسب إننا نقول : اقعد قدام الشيخ.
- لازم نهتم بتسمية كل حاجة.....كرسي، مصحف، شيخ، محفظ ،محفظه و هكذا......
- لازم نهتم بالروتين بتاع حصه القرآن....يبقي ف نفس المكان، نفس الوقت و اليوم، لازم يسلم الأول و يقول "سلام عليكم".
- نمتنع عن استخدام جمل منفيه و استبدالها بأخرى مثبته بمعني:
بدل ما أقول للطفل "متتحركش" أقول حاول تثبت..بدل ما أقول "متقومش من علي الكرسي" أقول اقعد علي الكرسي.
- لازم أقول السلوك المتوقع: اقعد علي الكرسي، رجلك علي الأرض ، أو اقعد مربع و هكذا...
- لما نثني علي الطفل لازم نفهمه هو عمل ايه صح: انت باصص للشيخ كويس...انت سامع الشيخ حلو أوي ، انت قاعد مربع حلو اوي و هكذا
- ياريت نبتدي ب آيات و نفهمها للطفل "مقترح من عندي" بدل السور القصيرة في الجزء الثلاثين (هي قصيرة بس ممكن تبقي صعبة جدا في الفهم و الشرح زي سورة الفلق، الناس، الماعون.......)ممكن نبتدي ب آيات ممكن يعمل حركات و هو بيردد ورا الشيخ
مقترح:
يَا أَيُّهَا الَّذِينَ آمَنُوا إِذَا قُمْتُمْ إِلَى الصَّلَاةِ فَاغْسِلُوا وُجُوهَكُمْ وَأَيْدِيَكُمْ إِلَى الْمَرَافِقِ وَامْسَحُوا بِرُءُوسِكُمْ وَأَرْجُلَكُمْ إِلَى الْكَعْبَيْنِ
و نبدأ نخلي الطفل يشاور علي اجزاء الجسم و هو بيقول الآيه ...
ربط الترديد بالحركات بيخلي الطفل انتباهه افضل....
ممكن كمان نحفظ الآيات ال ذكر فيها الالوان و نخلي الطفل يمسك اللون و هو بيقول الايه.....و هكذا.
- إننا نبعد شويه عن الإهتمام بال "كم" ... الأولي نهتم بفهم الآيات ، مخارج الألفاظ ، نطق كل الحروف ...و التكرار دايما بيعلم الشطار.
- لو أنا طفلي انتباهه ضعيف جداً ممكن نستخدم معزز في حصه القرآن: ستيكر و يختار هو و يشوف عايز يحطه علي خده، وشه أيده ، أو ورقة و يلزق فيها الاستيكرات ال الشيخ بيديهاله، ممكن نجيب ختم و نختم علي أيده كل ما يعمل حاجه صح. ممكن كمان المحفظ ينفخ بابلز للطفل كل م يردد وراه...
- لو طفلي كمان انتباهه قليل و مش راضي يقعد، ممكن يستفيد من المرجيحه القماش ، و المحفظه تبقي قدامه و هو بيردد، نهز بس المرجيحه هز بسيط عشان التركيز يبقي أحسن طول فترة الحصه.
