سماح أنور: ندمت إني اتكلمت عن حياتي .. فيديو

كشفت الفنانة سماح أنور عن شعورها بالندم بعد الحديث عن بعض أسرار حياتها الخاصة ومنها عدم شرب المياه لمدة 17 عاما متواصلة بسبب ما تعرضت له من انتقادات وسخرية رغم أن كلامها كان يخص حالتها فقط ولم تطلب من أحد تقليدها.

وقالت الفنانة سماح أنور خلال لقائها مع برنامج عرب وود: ندمت إني أنا بقول حاجة عني وقولت إني مابشربش مياه لوحدها لكن بشرب سوايل كتير وخضار كتير وفاكهة كتير ومصادر كتير باخد منها المياه فأنا كده باخد مياه برضو، ومش مهم إني بشرب مياه أو مش بشرب مياه مش عارفة ده يفيد الناس في إيه.

وأعادت سماح أنور نشر مقطع الفيديو الذي تحدثت فيه عن المياه وقالت في تسجيل صوتي: طلعت من كام يوم في لقاء تلفزيوني وحكيت عن تجربتي مع المياه وبعدها لقيت صحفيين كتير بيقولوا لي الدنيا مقلوبة عليكي وصحابي بعتوا ليا دكاترة بيردوا على تصريحاتي.

وأضافت: أنا مش بشتغل في حاجة تخص الطب تخلي كلامي مؤثر علميًا لهذه الدرجة لكن المذيعة كانت بتسألني عن تجربتي الشخصية مع المياه حتى قالت لي الدكاترة هيشدوا في شعرهم لما يسمعوا كلامك قلت لها الدكاترة صح ودي حاجة تخصني وما حدش يعمل به ونفعت معايا أنا لكن ما قلتش اوعوا تشربوا مياه وإلا أبقى ست مجنونة.

وتابعت سماح أنور توضيح حقيقة تصريحاتها: الناس سمعت أول كلامي وخلاص وأنا بنشر لهم الفيديو تاني علشان لما يلاقوا حاجة عكس الحقيقة يشيروا الفيديو لأن الناس بتهري في الفاضي وعلى الفاضي.

يذكر أن سماح أنور قالت إنها امتنعت تماما عن شرب المياه الطبيعية منذ 17 عاما بسبب احتوائها على لون ورائحة وتأثيرها بالسلب على صحتها مؤكدة أنها تقوم بتعويض هذا النقص بتناول الفاكهة والخضروات وشرب المياه الغازية بدون سكر أو تناول مشروبات ساخنة بشرط ان تقوم بغلي المياه للتخلص من أي ميكروبات.

وأضافت خلال لقائها ببرنامج كلام الناس على شاشة mbc مصر: لما باخد بق ميه جسمي بيضايق وبطني توجعني وأنا بتجاوب مع جسمي واشعر بما يؤلمه ولازم أوضح أنني لست طبيبة ولا متخصصة وهذا نظامي الخاص وقد يكون شديد الضرر بالأخرين.

وتابعت: إحنا مش لازم نشرب المياه بالفم .. أنا بأكل المياه كتير .. وده من خلال الفواكه والخضروات .. جسمي بياخد الكمية اللي محتاجها من خلالها .. اللي بيشرب مياه طول الوقت أصيبوا بأمراض على المدى البعيد على الأقل.