تامر فرج يناشد أصدقائه بزيارته فى المنزل: تعالوا نلحق بعض قبل ما نموت

حرص الفنان تامر فرج على مشاركة جمهوره بوست جديد عبر حسابه على فيس لوك ناشدهم فيه بزيارته فى المنزل.

حيث أكد قائلًا: "أشكر كل من هنأني بعيد ميلادى بس ليا عندكم طلب، خصوصًا من أصدقائى القدامى أنا راجل ماليش في الخروج، وبستمتع بجلوسى في بيتى بين أسرتى وحيواناتى، وبكون يا إما في البيت يا إما بصور، فمن فضلكم تعالوا زورونى".

وأضاف: "بقدم لكم دعوة مفتوحة في أي وقت رجلكم تجيبكم أكتوبر اتصلوا بيا ولو موجود عدوا عليا نشوف بعض، وأنا مابعملش ترتيبات لما حد يزورنى، والحمد لله ربنا رزقنى بزوجة مضيافة وحبوبة وبتفرح بأصدقائى، فمفيش إزعاج ولا تعب".

وتابع: "تعالوا نشوف بعض يا جماعة بدل الرسايل، لأنّ الملعونة السوشيال ميديا بتخدعنا وبتحسسنا أننا قريبين من بعض في حين أننا بكده بنبعد عن بعض قوي لما بنكتفى بمقابلة بعض فى عالم افتراضي، إحنا محتاجين نشوف بعض ونتفاعل مع بعض".

واختتم: "صدقونى إحساس صعب قوي لما تأجل مقابلة صديقك وتقابله بعد كده وأنت بتغسله أو وأنت شايله في صندوق.. تعالوا نلحق بعض قبل ما نتخطف من بعض".