ربوا آباء وأمهات المستقبل
طريق السعادة
د. هالة منصور .. استاذ علم الاجتماع
استكمالا لما ذكرته الحلقة السابقة عن علاقة الآباء بالأبناء واختلاف طموحات الأبناء عن طموحات الآباء أقول لكل أب وكل أم: اوعوا تدّفعوا أولادكم فواتير تعبكم وتربيتكم ورعايتكم إجباري لما تتقل في الأواخر. لو علمتوهم من البداية أول بأول السداد بالمحبة والمودة مش هنتعب كتير. لازم نوازن في المشاعر والاهتمام. لما ندي حب نأخد عرفان. ندي اهتمام نأخد تقدير. ندي إيثار نأخد امتنان من الطفولة والشباب للرجولة والمسئولية باستمرارية. ولازم نستمر مع بعض كده لما ولادنا يدونا اهتمام برضه. لازم ندي شكر ولو ادونا محبة. ندي تقدير ولو لمحنا عدم اهتمام أو عقوق نفهم ونوعي ونحاسب بذكاء وبرضه بحب بس بتوازن ما نقلش فاتورة بتتسدد ما احنا قلنا الحياة هات وخد وأحلي حاجة فيها التسامح وتبادل المواقع مع لمس الأعذار.
أقول لأولادنا: خلوا بالكم من الاهل لما يحتاجوا كلمة ولا اهتمام ولا مشاركة أو مساندة. دي الدنيا هات وخد. عارفين ليه عقوق الوالدين أو الأبناء عقابه دنيا وآخرة؟ لأن في الدنيا بيبقي أسلوب حياة زي ما بتتعامل مع والديك هيتعلموا منك أولادك وهتورثهم المعاملة اللي هيعاملوك بيها زي ما بتتعامل مع أهلك واخواتك لما يكبروا. هيورثوا برضة درجة كبيرة من المعاملة سواء حلوة أو مرة. فكما تدين تدان. فالله سبحانه وتعالي هو من أمرنا برعاية الأرحام وصلتها.
حبوا أولادكم حبا إيجابياً. ربوهم وعلموهم فن الحياة. واوعوا تنسوا انكم انتوا القدوة. قربوا. حنوا. اعطفوا. حبوا. ضحوا بس بتوازن. وخلوا الحياة دايما هات وخد لأن أولادنا امتداد وجودنا ورصيد المحبة والأمان في حياتنا. ربوهم للحياة مش للمهنة والمنفعة والأنانية وكل شئ مجاب وكل حاجة حق. علموهم إن أي حق يقابلة واجب.
ربوا آباء وأمهات للمستقبل. ربوا إنسانا يعرف قيمته وقيمة ربه بالإيمان الحق. ربوا عضواً في عيلة عارف واجباته والتزاماته من مودة. وتواصل ومؤازرة. ربوا فيهم إنساناً. عم وخال وعمة وخالة واخ واخت. دربوهم علي كل الأدوار في الحياة بالتوازن والتكافؤ وانه برضه كله خد وهات وساعات بيبقي هات وخد حسب المواقف والظروف. حبوا السعادة لبعض هتلاقوها جوا كل القلوب والنفوس. ماهي السعادة دايما بالكرم في المشاعر. بالأصول. بكلمة حلوة طيبة. بنظرة حنينة وقت الاحتياج. بطبطبة وقت اللزوم. نبقي لبعض سند ولأهلنا وتد. وراحة وأمان. وساعتها هتدوم المحبة وتتواصل الأجيال بأمان وثقة وأصول. وللحديث بقية إن شاء الله.
