درَّبوا اللسان علي الكلام الحلو

طريق السعادة

د. هاله منصور أستاذ علم الاجتماع

وارجع تاني واقولك ريحني الله يخليك ما تخليش الدنيا تلعب بيا وبيك. خلي شوية عليا وخلي شوية عليك .. فعلا لازم نحاول نريح بعض. لازم نحاول نحس ببعض. لازم الدنيا تمشي بالتفاوض مش بالصراع. لازم كل واحد يظهر الحلو إللي جواه للتاني ويقرب بقلبه شوية للي بيحبهم. ويحاول دايما يفترض حسن النوايا وجوا دايرة الحبايب من الأهل والمعارف والأصدقاء يكون عنده دايما المبادرة للخير وإبداء المشاعر الطيبة.

لازم نقسم علي بعض الضحكة والفرحة والخير واوعوا تحسبوها بالند. ابعدوا عن المعاندة والمكابرة والصراع. وإياكم وشرارة الأحزان..
عالجوا الجروح بالحنية بالكلمة الطيبة بتلمس الأعذار . بالتغاضي. بالتراضي. بالتسامح. بحسن النوايا هتبقي الحياة أحلي. والدنيا أسهل.

علموا أولادكم أن العطاء نعمة وقدرة. دربوهم علي المحبة. عودوا القلوب علي الود. دربوا اللسان علي الكلام الحلو. أهلوا الأرواح للمحبة. استمتعوا بحبايبكم قبل الزمان مايبعدكم. عيشوا حلو الحياة والمشاعر علشان تقدروا تواجهوا الصعاب.

افتحوا القلوب لبعض. عاتبوا. اشكوا. احكوا. عبروا عن اللي جواكم بس بذكاء. بلين. بحب. واوعوا تجرحوا حبايبكم. ولو حصل لازم تعرفوا تداووا الجروح وتعالجوا المشاعر بالوصل والمحبة والتراضي والتسامح والإعتزار في وقته. ولما ما تقدروش خليها علي الكريم الودود الرحيم الوهاب. ده هو صاحب الأملاك في كل حاجة وموزع الأرزاق ومؤلف القلوب. ادعوه بإخلاص اوصلوه بصلة الارحام. قربوا منه بالمحبة والرضا وحب خير للكل. ويارب نقابل ربنا كلنا بالقلب السليم نبقي فعلا في طريق السعادة. وللحديث بقية إن شاء الله.