طارق حامد يوجه رسالة للاعبي الزمالك قبل رحيله لإتحاد جدة

حرص طارق حامد لاعب وسط الزمالك على توديع زملائه في الفريق قبل رحيله بشكل رسمي وانضمامه لصفوف اتحاد جدة السعودي في الميركاتو الصيفي الجاري.

وقال حامد للاعبي الزمالك: "الأول مبروك على الكاس تستهلوا البطولة، كان نفسي أكون موجود معاكم، بس الظروف مكنتش ماشية كويس، فيه حاجات مش واضحة، بعدين أوضحها لما تكون الظروف مناسبة".

وأضاف: "فيه أوقات مينفعش تبص لنفسك بس، لكن بتبص للفريق والنادي، والوقت ده مكنش ينفع فيه كلام عشان استقرار الفريق".

وأكمل: "قدامكم بطولة الدوري، بطولة مش صعبة ومش سهلة في نفس الوقت، مش هتكون صعبة لو ركزتوا على ماتش ماتش وكسبتوه، زي ما حصل السنة اللي فاتت، وكسبنا آخر 7 ماتشات وخدنا البطولة في ظروف استثنائية، لو حافظتوا على الدوري السنة دي مش هيكون إنجاز، هيكون إعجاز".

وأختتم: "كنت أتمنى إني أساعدكم، لكن أنا عمري والله لا هربت ولا أدعيت إصابة ولا أتمارضت، 8 سنين في الزمالك بدي كل حاجة جوة الملعب وبرة الملعب، وبساعد كل الناس من قلبي، بتمنالكم التوفيق، وإن شاء الله أشوفكم على خير".